पुढच्या वर्षी सुटय़ांची चंगळ!

पुढील वर्षी सुट्टय़ांची चंगळ असून सात सुट्टय़ा रविवारला जोडून, तर चार सुट्टय़ा शुक्रवारला जोडून आल्या आहेत. चार सार्वजनिक सुट्टय़ा रविवारी आल्यामुळे नोकरदारांची ती सुट्टी मात्र हुकली आहे. ज्येष्ठ पंचांगकर्ते आणि खगोल अभ्यासक दा. कृ. सोमण यांनी २०१६ मध्ये कोणते सण, उत्सव कोणत्या तारखांना व कोणत्या वारी येत आहेत, त्याची माहिती एका प्रसिद्धी पत्रकाद्वारे दिली आहे.
महाशिवरात्र (सोमवार, ७ मार्च), स्वातंत्र्य दिन (सोमवार, १५ ऑगस्ट), श्रीगणेश चतुर्थी (सोमवार, ५ सप्टेंबर), बकरी ईद (सोमवार, १२ सप्टेंबर), दीपावली-बलिप्रतिपदा (सोमवार, ३१ ऑक्टोबर), गुरू नानक जयंती (सोमवार, १४ नोव्हेंबर), ईद-ए-मिलाद (सोमवार, १२ डिसेंबर) या सात सुट्टय़ा रविवारला जोडून आल्या आहेत. त्यामुळे ज्यांना पाच दिवसांचा आठवडा आहे त्या नोकरदारांना सलग तीन दिवस सुट्टी मिळणार आहे. २०१६ या वर्षांतील दिनदर्शिकांची तयारी पूर्ण झाली असून या सुट्टय़ा त्यानुसार दिल्या आहेत. मात्र सुट्टय़ांची अधिकृत यादी राज्य शासनाकडून जाहीर केली जाईल, असेही सोमण यांनी या पत्रकात म्हटले आहे.