कुलदीप घायवट
मुंबई : मध्य रेल्वेवरून दररोज लाखो प्रवासी प्रवास करतात. या गर्दीचे नियोजन करण्यासाठी मध्य रेल्वेकडून अनेक उपाययोजना, मोहिमा राबविल्या जातात. यामधील मध्य रेल्वेच्या रेल्वे सुरक्षा दलाद्वारे ‘माय लेफ्ट इज माय राइट..’ ही मोहीम सुरू केली. मात्र या मोहिमेचा विसर मध्य रेल्वेला झाल्याचे दिसून येत आहे. मध्य रेल्वेच्या दादर स्थानकात डाव्या बाजूने चढणारा सरकता जिना असणे आवश्यक असताना, उजव्या बाजूने चढणारा जिना आहे. त्यामुळे प्रवाशांमध्ये घोळ होत असून भविष्यात मोठा अपघात घडण्याची भीती आहे.
मध्य रेल्वेच्या रेल्वे सुरक्षा दल (आरपीएफ) विभागाने जुलै २०१९ पासून ‘माय लेफ्ट इज माय राइट- प्लीज कीप लेफ्ट’ ही सर्वात मोठी जनजागृती मोहीम सुरू केली. ज्यातून प्रवाशांना पादचारी पूल, सरकता जिन्यावरून डाव्या बाजूने चालण्याचे आवाहन केले जाते. लोकलमध्ये चढताना आणि उतरताना, रेल्वेच्या फाटकाचा वापर करताना डाव्या बाजूचा वापर करा, पायऱ्या, सरकते जिने आणि पादचारी पूल चढताना आणि उतरताना डाव्या बाजूचा वापर करा. जेणेकरून चेंगराचेंगरीच्या घटना, चोरीच्या घटना टाळता येतील, असे आवाहन मध्य रेल्वेकडून केले आहे.
दरम्यान, नियमानुसार, फलाटावरील दोन सरकते जिने असताना, उजव्या बाजूच्या सरकत्या जिन्याने प्रवासी उतरतात. तर डाव्या बाजूच्या सरकत्या जिन्याने प्रवासी चढतात. परंतु सर्वाधिक गर्दीच्या स्थानकांपैकी एक असलेल्या मध्य रेल्वेवरील दादर स्थानकाच्या फलाट क्रमांक तीन आणि चारवरील सरकत्या जिन्याची रचना चुकीच्या पद्धतीची आहे.
दादर रेल्वे स्थानकातील सरकत्या जिन्याच्या रचनेत बदल करण्याच्या सूचना दिल्या आहेत. तसेच, मुंबई विभागातील इतर सरकत्या जिन्यांची तपासणी करून त्यामधील दोष दूर करण्याच्या सूचना दिल्या आहेत. – रजनीश कुमार गोयल, विभागीय रेल्वे व्यवस्थापक, मध्य रेल्वे
मध्य रेल्वेकडून उभारलेल्या अनेक जिन्यांची रचना चुकीची आहे. त्यामुळे प्रवाशांची गैरसोयीचे होते. – नंदकुमार देशमुख, अध्यक्ष, उपनगरीय प्रवासी महासंघ
