रिक्षा, टॅक्सी मीटरमधील बदलास आजपासून सुरुवात

 रिक्षाचे भाडे दोन रुपयांनी, तर टॅक्सीच्या भाडय़ात तीन रुपयांनी वाढ करण्यावर मुंबई महानगर क्षेत्र परिवहन प्राधिकरणाकडून शिक्कामोर्तब करण्यात आले आहे. १ ऑक्टोबरपासून याची अंमलबजावणी केली. त्यामुळे रिक्षाचे सध्याचे दीड किलोमीटर या पहिल्या टप्प्याकरिता असलेले किमान भाडे २१ रुपयांऐवजी २३ रुपये, तर  टॅक्सीचे भाडे २५ रुपयांहून २८ रुपये झाले. कूल कॅबचेही भाडेदर महागले आणि सध्या दीड किलोमीटरसाठीचे किमान भाडे ३३ रुपयांऐवजी ४० रुपये झाले. नवीन भाडेदर आकारणीसाठी रिक्षा-टॅक्सीच्या मीटरमध्ये बदल करावे (रिकॅलिब्रेशन) लागणार असल्याने १ ऑक्टोबर ते ३० नोव्हेंबपर्यंत बदल करण्याच्या सूचना करण्यात आल्या. हे बदल करण्यासाठी मीटरमध्ये एक चिप बसवण्यात येते; परंतु मीटरमधील विविध चाचण्यांमुळे उत्पादकांकडून ही प्रक्रिया काहीशी लांबली. परिणामी मुंबई महानगरात रिक्षा-टॅक्सीच्या मीटरमध्ये बदल झाले नाहीत आणि नवीन भाडे आकारणीही होऊ शकली नाही. मीटर बदलाची ही प्रक्रिया १२ ऑक्टोबरपासून सुरू होत असल्याची माहिती परिवहन विभागातील एका वरिष्ठ अधिकाऱ्याने दिली.

प्रवासी-चालकांत वाद

मीटरमध्ये बदल होईपर्यंत क्यूआर कोड असलेले सुधारित अधिकृत भाडेदर तक्ता वापरण्याच्या सूचना परिवहन विभागाकडून रिक्षा, टॅक्सीचालकांना केल्या. त्यानुसार क्यूआर कोड असलेले भाडेदर तक्ता संघटनांमार्फत चालकांना उपलब्धही केले. मात्र चालकांकडून क्यूआर कोड नसलेले भाडेदर तक्ताचा वापर केला जात असून त्यानुसारच प्रवाशांकडून भाडे आकारले जात आहे. त्यामुळे प्रवासी व चालकांत वादही होत आहेत. यासंदर्भातही परिवहन विभागातील एका वरिष्ठ अधिकाऱ्यांना सांगितले असता, त्याबाबत माहिती घेतली जाईल, असे स्पष्ट केले.