मुंबई : मुंबई महापालिकेने प्रकल्पबाधितांसाठी बांधलेली माहुल येथील घरे कर्मचाऱ्यांना स्वस्तात देण्याचा निर्णय घेण्यात आला असला तरी कर्मचाऱ्यांकडून या घरांसाठी अत्यल्प प्रतिसाद मिळत आहे. त्यामुळे पालिका प्रशासनाने या योजनेच्या अटीमध्ये बदल केले आहेत. महानगरपालिकेच्या वर्ग १ व्यतिरिक्त सर्व कर्मचाऱ्यांना ही घरे विकत घेता येणार आहेत. तसेच कर्मचारी निवासस्थानात राहणाऱ्या कर्मचाऱ्यांना ही घरे विकत घेता येतील.
मुंबई महापालिकेने पूर्व उपनगरात माहुल येथे प्रकल्पबाधितांसाठी घरे बांधली आहेत. यापैकी काही घरांमध्ये प्रकल्पबाधित राहतात. बहुतांशी घरे रिकामीच आहेत. या घरांच्या देखभालीसाठी महापालिकेला मोठा निधी खर्च करावा लागत आहे. त्यामुळे मुंबई महापालिकेने माहुल येथील १३ हजार घरांपैकी ९,०९८ घरे विक्रीला काढली आहेत. ही घरे महापालिकेच्या तृतीय आणि चतुर्थ श्रेणी कामगारांना स्वस्तात विकत देण्याचे ठरवले होते. सफाई कामगारांचा या घरांना फारसा प्रतिसाद नसल्यामुळे पालिकेने आता नवीन पर्यायांचा विचार करण्याचे ठरवले आहे.
नवीन अटी काय
नवीन अटीनुसार मुंबई महानगरपालिकेच्या वर्ग १ व्यतिरिक्त सर्व कर्मचाऱ्यांना माहुलमधील घरे विकत घेता येणार आहेत. तसेच कर्मचारी निवासस्थानात राहणाऱ्या महापालिका कर्मचाऱ्यांनाही माहुलमधील घरे विकत घेता येणार आहेत. परंतु अशा कर्मचाऱ्यांना सध्याच्या योजनेत सदनिका वाटप झाल्यास कर्मचारी निवासस्थान रिक्त करावे लागेल. ही योजना ऐच्छिक स्वरुपाची असल्याचेही मुंबई महानगरपालिका प्रशासनाने म्हटले आहे.
अर्ज करण्यासाठी मुदत वाढवली
या योजनेअंतर्गत एक घर १२ लाख ६० हजार रुपयांत तर दोन घरे २५ लाख २० हजार रुपयांत खरेदी करू शकणार आहेत. त्यासाठी म्युनिसिपल बँकेकडून ८.५० टक्के व्याज दराने ९० टक्के कर्जही दिले जाणार आहे. या घरांसाठी १७ मार्चपासून अर्ज स्वीकारण्यास सुरुवात झाली. १५ एप्रिल ही अर्ज करण्याची शेवटची तारीख होती. या योजनेला फारसा प्रतिसाद मिळत नसल्यामुळे प्रशासनाने कामगार संघटनांचीही मदत घेतली होती. मात्र तरीही शेवटच्या दिवसांपर्यंत केवळ १७५ अर्ज आले होते. त्यामुळे प्रशासनाने या घरांसाठी अर्ज करण्याकरीता मुदत वाढवण्याचे ठरवले आहे. आता या योजनेसाठी पालिकेच्या कर्मचाऱ्यांना १५ मेपर्यंत अर्ज करता येणार आहे.
वार्षित सात कोटी रुपये देखभाल खर्च
माहुलमध्ये बांधण्यात आलेल्या घरांच्या देखभालीसाठी पालिकेला वर्षाकाठी ७ कोटी रुपये खर्च येतो. ही घरे रिकामी राहिली तर त्यामुळे पालिकेलाच तोटा होणार आहे. यातून मार्ग काढण्यासाठी मुंबई महापालिकेतील कामगार संघटनांबरोबर चर्चा करून मार्ग काढला जाणार आहे. त्याचबरोबर निवृत्त झालेले सफाई कर्मचारी जर ही घरे घेण्यास इच्छुक असतील तर त्यांनाही घरे देण्याबद्दल विचार केला जाणार असल्याचे पालिकेच्या एका अधिकाऱ्यांनी सांगितले.
१) एवर स्माईल पीएपी संकुल, माहुल आंबा पाडा, आणिक गाव येथील सदनिका खरेदीतत्वावर उपलब्ध करण्यात आल्या आहेत.
२) अर्ज सादर करण्याची अंतिम तारीख १५ मेपर्यंत वाढवली आहे.