मुंबईः टोरेस गुंतवणूक गैरव्यवहार प्रकरणात आर्थिक गुन्हे शाखेने सोमवारी आठ आरोपींविरोधात सत्र न्यायालयात आरोपपत्र दाखल केले. हे आरोपपत्र २७ हजार १४७ पानांचे आहे. याप्रकरणात आतापर्यंत १४ हजार १५७ गुंतणूकदार आर्थिक गुन्हे शाखेकडे आले असून त्यांची १४२ कोटी ५८ लाख रुपयांची फसवणूक झाली आहे. मुंबई, नवी मुंबई, ठाणे आणि मीरा-भाईंदर या भागांतील हजारो गुंतवणूकदारांचे याप्रकरणात कोट्यावधींची फसवणूक करून परदेशात पलायन केलेल्या नऊ आरोपींविरोधात पोलिसांनी ब्लू कॉर्नर नोटीस जारी केली आहे.
आर्थिक गुन्हे शाखेने याप्रकरणी मे. प्लाटिनम हेर्न प्रा.लि., तानिया ऊर्फ टॅझगुल झॅस्टोव्हा, व्हेलेन्टिना गणेश कुमार, सर्वेश सुर्वे, अल्पेश खारा, तौसिफ रियाझ, अर्मेन ॲटीयन व लल्लन सिंह या आठ आरोपींविरोधात विशेष एमपीआयडी न्यायालयात आरोपपत्र दाखल केले आहे. २७ हजार १४७ पानांच्या आरोपपत्रात सर्व आरोपींचा सहभागाबाबतची माहिती देण्यात आली आहे.
३५ कोटींची मालमत्ता जप्त
आर्थिक गुन्हे शाखेने टोरेस प्रकरणात आतापर्यंत ३५ कोटी रुपयांची मालमत्ता जप्त केली आहे. तसेच टोरेस कंपनीशी संबंधित फर्निचर, विद्युत उपकरणे, सात ते आठ मोटरगाड्या यांचा लिलाव करण्याबाबत एमपीआयडी न्यायालयाकडे परवानगी मागण्यात आली आहे. तसेच टोरेसमधील आरोपींनी जयपूर येथील कंपनीतून मौल्यवान खडे खरेदी केले होते. त्या कंपनीने ते मोल्यवान खडे परत घेऊन पैसे देण्याची तयारी दर्शवली आहे.
सुमारे दीड कोटी रुपयांच्या मौल्यवान खड्यांची पुन्हा विक्री करण्याबाबतची परवानगीही पोलिसांनी न्यायालयाकडे मागितली होती. त्याशिवाय याप्रकरणी जिल्हाधिकाऱ्यांना सक्षम अधिकारी म्हणून नेमण्याच्या प्रक्रियेला सुरूवात करण्यात आली आहे. त्यासाठीही परवानगी मागण्यात आली आहे. याप्रकरणी आतापर्यंत १४ हजार १५७ गुंतवणूकदारांची ११४२ कोटी ५८ लाख रुपयांची फसवणूक झाल्याचे निष्पन्न झाले आहे.
महामुंबईत हजारो गुंतवणूदार
मुंबई, नवी मुंबई, ठाणे आणि मीरा-भाईंदर या भागांतील हजारो गुंतवणूकदारांचे याप्रकरणात कोट्यावधींचे नुकसान झाले आहे. हा संपूर्ण कट युक्रेनमधील नागरिक असलेल्या मुख्य आरोपीने रचला होता. या प्रकरणात आरोपी असलेले युक्रेनमधील आठ नागरिक आणि तुर्कस्तानमधील एक नागरिक सध्या फरार आहेत.
पोलिसांनी संशयित सूत्रधार ओलेना स्टोइयान, व्हिक्टोरिया कोव्हालेन्को, मुस्तफा कराकोच, ओलेक्झांडर बोराविक, ओलेक्झांडर झापिचेंको, ओलेक्झांड्रा ब्रुंकीव्स्का, ओलेक्झांड्रा त्रेडोखिब, आर्टेम ओलिफरचुक आणि इयुर्चेंको यांच्या विरोधात ब्लू कॉर्नर नोटिस जारी केली आहे. टोरेस प्रकरणातील मुख्य सूत्रधाराने गैरव्यवहारातील २०० कोटी रुपये परदेशात पाठवल्याचा संशय आहे. हा गैरव्यवहार उघड होण्यापूर्वी काही सतर्क नागरिक व गुंतणूकदारांनी पोलीस व इतर यंत्रणांना या प्रकरणाची ई-मेलद्वारे माहिती दिली होती.
ईडीकडूनही तपास
याप्रकरणी ईडीही तपास करीत आहे. त्यांनी याप्रकरणी जयपूर व मुंबईतील १३ ठिकाणी छापे टाकून मोठ्या प्रमाणात संशयीत कागदपत्रे, डिजिटल पुरावे जप्त करण्यात आले आहेत. तसेच, मे. प्लाटीनम हेर्न प्रा. लि.(टोरेस ज्वेलरी) आणि त्याच्या सहयोगी संस्थांच्या नावावर असलेली बँक खाती गोठवण्यात आली आहेत. त्यात २१ कोटी ७५ लाख रुपये असल्याची माहिती सूत्रांनी दिली. याप्रकरणी शिवाजी पार्क पोलीस ठाण्यात भारतीय न्याय संहिता कलम ३१६ (५), ३१७ (२), ३१७ (४), ३१७ (५), ३१५ (५) व महाराष्ट्र महाराष्ट्र ठेवीदार संरक्षण (एमपीआयडी) कायदा कलम २१, २३ अंतर्गत गुन्हा दाखल करण्यात आला होता. या प्रकरणाचा तपास आर्थिक गुन्हे शाखा करीत आहे.
