मुंबई : मुख्यमंत्री एकनाथ शिंदे यांच्या महत्त्वाकांक्षी समूह विकास प्रकल्पात ठाण्यातील टेकडी बंगला, किसननगर आणि हजुरी या भागातील समूह गृहनिर्माण प्रकल्प योजना राबविण्यासाठी सुमारे पाच हजार कोटी ‘महाप्रित’ या कंपनीस समभाग आणि कर्जरोख्यांच्या माध्यमातून उभे करण्यास राज्य मंत्रिमंडळाच्या बैठकीत रविवारी मान्यता देण्यात आली. हेही वाचा >>> ‘झोपु’ प्रकल्पांना लवकरच वेग; रखडलेले २२८ प्रकल्प पूर्ण करण्याचा मंत्रिमंडळ बैठकीत निर्णय; दोन लाख सदनिकांची बांधणी ठाण्यातील टेकडी बंगला, हजुरी आणि किसन नगर भागातील समूह विकास प्रकल्प योजना राबविण्याकरिता सहा हजार कोटींपेक्षा अधिक खर्च अपेक्षित आहे. यापैकी पाच हजार कोटी रुपये कर्जरोखे अथवा समभागाच्या माध्यमातून उभे करण्यास मंत्रिमंडळाने मान्यता दिली. हे तिन्ही प्रकल्प मुख्यमंत्री शिंदे यांच्यासाठी महत्त्वाचे आहेत. यापैकी दोन प्रकल्प हे मुख्यमंत्र्यांच्या मतदारसंघातील आहेत. कर्जरोख्यातून निधी उभा करण्यात आल्याने या प्रकल्पांसाठी निधीची चणचण भासणार नाही. भिवंडी येथे चाविंद्रे व पोगाव येथे प्रधानमंत्री आवास योजनेअंतर्गत सदनिका, चंद्रपूरमधील म्हाडाच्या कोसरा येथील सदनिका, यवतमाळ व वडगावमधील सदनिका, ठाणे, नागपूर व पुणे महानगरपालिकांमध्ये अक्षय ऊर्जा प्रकल्प, मुंबई महानगरात ईव्ही पार्क, मेडीसिटी, रसायन केंद्र, डिजिटल विद्यापाठी असे प्रकल्प राबविण्यास मंत्रिमंडळाने मान्यता दिली.
