मुंबईतील कोस्टल रोडच्या एका लेनचं उद्घाटन आज मुख्यमंत्री एकनाथ शिंदे यांच्याहस्ते करण्यात आलं. यावेळी उपमुख्यमंत्री देवेंद्र फडणवीस, उपमुख्यमंत्री अजित पवार हेही उपस्थित होते. या सागरी मार्गाला छत्रपती संभाजी महाराजांचं नाव देण्याची घोषणा यावेळी एकनाथ शिंदे व देवेंद्र फडणवीसांनी त्यांच्या भाषणात केली. यावेळी एकीकडे देवेंद्र फडणवीसांनी कोस्टल रोडचं श्रेय ठाकरे गटाकडून घेण्यावर टीका केली असताना दुसरीकडे एकनाथ शिंदे यांनीही यावरून माजी मुख्यमंत्री उद्धव ठाकरे वरळीचे आमदार आदित्य ठाकरे यांच्यावर खोचक शब्दांत टीका केली.
“कोस्टल रोड मुंबईकरांसाठी गेम चेंजर”
कोस्टल रोड मुंबईकरांसाठी गेम चेंजर ठरणार असल्याचं मुख्यमंत्री एकनाथ शिंदे आपल्या भाषणात म्हणाले. “मुंबईकरांचं कोस्टल रोडचं स्वप्न होतं. हा एक गेम चेंजर प्रकल्प आहे. हा फक्त रस्ता नाही. याचं महत्त्व जनतेला कळतंय. असे प्रकल्प वेळेत पूर्ण करण्याचं काम सरकारकडून केलं जातंय”, असं मुख्यमंत्री म्हणाले.
“केल्याने होत आहे रे, आधी केलेचि पाहिजे”
“केल्याने होत आहे रे, आधी केलेची पाहिजे असं आपण म्हणतो. पण पूर्वीच्या सरकारचा कदाचित यावर विश्वास नव्हता. त्यामुळे त्याला विलंब होत होता. सोशल मीडियावर ‘आम्ही केलेलं काम’ असं म्हणून कुणीतरी प्रचार करतंय. पण त्यात अडथळे किती घातले गेले? हा प्रकल्प कसा लांबेल हे पाहिलं गेलं”, असा आरोप एकनाथ शिंदे यांनी उद्धव ठाकरेंचं नाव न घेता केला.
“न्यायालयाची प्रकरणं, परवानग्या देवेंद्र फडणवीस मुख्यमंत्री असताना मिळवल्या. त्यामुळे हा प्रकल्प जलदगतीने पूर्ण होतोय. पण केलेल्या कामाचं श्रेय द्यायला मनाचा मोठेपणा लागतो. कद्रू वृत्तीचा माणूस कधीच ते श्रेय देऊ शकत नाही. गरज सरो आणि वैद्य मरो असे लोक असतात. त्याच्यावर काय बोलायचं?” असा उपरोधिक सवालही एकनाथ शिंदे यांनी उपस्थित केला.
“कोळी बांधवांना दोन पिलरमधलं अंतर मोठं हवं होतं. ६० मीटरवरून ते आपण १२० मीटर केलं. त्या वेळचे स्थानिक आमदार, मुख्यमंत्र्यांकडे कोळी बांधव भगिनी ही मागणी घेऊन गेल्या होत्या. पण हे शक्य होणार नाही असं त्यांनी सांगितलं होतं. पण आम्ही हा मुद्दा निकाली काढला. आम्ही मनाचा मोठेपणा दाखवला. ज्यांना कोतेपणा दाखवायचा होता त्यांनी दाखवला”, अशी टीकाही त्यांनी केली.
आदित्य ठाकरेंवरही अप्रत्यक्ष टीका
दरम्यान, यावेळी मुख्यमंत्री एकनाथ शिंदे यांनी वरळीचे आमदार आदित्य ठाकरे यांनाही अप्रत्यक्षपणे लक्ष्य केलं. “आज काही लोक म्हणतात की मी अमुक ठिकाणी उभा राहतो, नवा मतदारसंघ शोधतो वगैरे. पण ज्या लोकांनी निवडून दिलं त्यांना तर सेवा द्या. वरळीतला हा विषय होता. कोळी बांधवांना आपण न्याय देऊ शकला नाहीत. आमदाराचं, मुख्यमंत्र्यांचं, मंत्र्यांचं काय काम असतं? सर्वसामान्य माणसाला न्याय देण्याचं काम करायला पाहिजे”, असं एकनाथ शिंदे यावेळी म्हणाले.
