‘कॉमेडी नाईट्स विथ कपिल’चा शेवटचा भाग प्रसारितच न झाल्याने हळहळ

घरातील प्रत्येकाची हसवणूक करणारा ‘कॉमेडी नाईट्स विथ कपिल’ हा कार्यक्रम अल्पावधीतच नावारूपाला आला होता. मात्र, गेल्या काही दिवसांपासून ‘कलर्स’ वाहिनीवरून ‘कॉमेडी नाईट्स बचाव’ हा स्वतंत्र कार्यक्रम सुरू करण्यात आला. त्यावेळीच ‘कॉमेडी नाईट्स विथ कपिल’चा लवकरच शेवट होणार हे स्पष्ट झाले होते. त्यानुसार गेल्या आठवड्यात कपिल शर्मा याने शेवटच्या भागाची तारीख जाहीर केली होती. कालसुद्धा त्याने ‘ट्विटर’च्या माध्यमातून शेवटचा भाग ‘कलर्स’ वाहिनी प्रसारित करेल, असे जाहीर केले होते. पण वाहिनीने हा भागच प्रसारित केला नाही.
दरम्यान, शेवटच्या भागासाठी अभिनेता अक्षय कुमार याला विशेष अतिथी म्हणून निमंत्रित करण्यात आले होते. शेवटच्या भागाची एक व्हिडिओ क्लीप सध्या सोशल मीडियावर व्हायरल झाली आहे. या शोमध्ये गुत्थीचे पात्र साकारणारा सुनील ग्रोव्हर चित्रीकरणावेळी भावनिक झाला. त्याला आपले अश्रूही आवरता आले नाहीत. ‘आप आए है इस बगियां मै, फूल खिलें है गुलशन गुलशन’ या ओळीही त्याला गाता आल्या नाहीत. यावेळी स्वतः कपिल शर्मा याच्यासह इतर सर्वच कलाकार भावनिक झाल्याचे व्हिडिओवर पाहायला मिळते. या शोचे खास आकर्षण असलेले माजी क्रिकेटपटू नवज्योतसिंग सिद्धू यांना सुद्धा शेवटच्या भागावेळी आपले अश्रू अनावर झाले होते.