मुंबई : एमएचटी सीईटीच्या पीसीएम गटाच्या परीक्षेच्या दुसऱ्या दिवशी कुर्ला येथील आकार कम्युनिकेशन या परीक्षा केंद्रावर सकाळच्या सत्रात अचानक वीज गेली. वीज व इंटरनेट नसल्याने दोन तास विद्यार्थी परीक्षा केंद्रामध्ये बसून राहिले. अखेर राज्य सामाईक प्रवेश परीक्षा कक्षाकडून सकाळच्या सत्रातील परीक्षा रद्द करण्याचा निर्णय घेतला. मात्र त्या केंद्रावर दुपारच्या सत्रातील परीक्षा सुरळीत पार पडली. या सर्व विद्यार्थ्यांची परीक्षा बुधवारी घेण्यात येणार असल्याचे सीईटी कक्षाकडून सांगण्यात आले.
अभियांत्रिकी अभ्यासक्रमासाठीच्या प्रवेश परीक्षेला १९ एप्रिलपासून सरू झाली. परीक्षेच्या दुसऱ्या दिवशी कुर्ला येथील आकार कम्युनिकेशन या परीक्षा केंद्रावर सकाळी ७ वाजता विद्यार्थी परीक्षा देण्यासाठी आले. ९ वाजता परीक्षा सुरू झाल्यानंतर काही वेळातच परीक्षा केंद्रावरील वीज गेली. त्यामुळे परीक्षेसाठी आलेल्या मुलांमध्ये चिंतेचे वातावरण पसरले होते. ही समस्या दूर करण्यासाठी केंद्र चालकाला दोन तास लागले. तोपर्यंत विद्यार्थी परीक्षा केंद्रावरच बसून होते. जनरेटरची व्यवस्था केल्यानंतर विजेची समस्या दूर झाली. मात्र त्यानंतर इंटरनेटच्या समस्येमुळे विद्यार्थ्यांना परीक्षाच देता येत नव्हती.
आकार कम्युनिकेशन या केंद्रावरील सकाळच्या सत्रातील परीक्षा अखेर रद्द करण्याचा निर्णय राज्य सामाईक प्रवेश परीक्षा कक्षाकडून घेण्यात आला. या सर्व गोंधळामध्ये परीक्षा केंद्राच्या आत ९ वाजता गेलेले विद्यार्थी २ वाजेपर्यंत आतमध्येच बसून होते. कुर्ला येथील आकार कम्युनिकेशन या परीक्षा केंद्रावर मालाड, भांडुप, मुलुंड, मीरा राेड, भाईंदर या ठिकाणाहून ६२ विद्यार्थी या परीक्षा केंद्रावर परीक्षेसाठी आले होते. परीक्षेवेळी उडालेल्या या गोंधळामुळे विद्यार्थ्यांमध्ये चिंतेचे वातावरण पसरले होते.
विद्यार्थ्यांना दुपारी २ वाजता परीक्षा केंद्रातून बाहेर सोडण्यात आले. मात्र केंद्रावर वीज नसल्याने आणि खोल्यांमधील दुरवस्थेमुळे विद्यार्थ्यांना उकाड्याचा सामना करावा लागला होता. परीक्षा केंद्रावरील व्यवस्था चांगली नसल्याबाबत विद्यार्थी व पालकांकडून संताप व्यक्त करण्यात आला. दरम्यान बुधवारी होणारी परीक्षा या केंद्रावर घेण्यात येऊ नये. अन्य केंद्रावर घेण्यात यावी, अशी मागणी पालक व विद्यार्थांकडून करण्यात येत आहे.
कुर्ला येथील आकार कम्युनिकेशन या परीक्षा केंद्रावर सकाळी अचानक विजेची समस्या निर्माण झाली. त्यामुळे एमएचटी सीईटीच्या पीसीएम गटातील सकाळच्या सत्रातील परीक्षा रद्द करण्यात आली. मात्र दुपारच्या सत्रात परीक्षा सुरळीत पार पडली. दरम्यान परीक्षा रद्द करण्यात आलेल्या ६२ विद्यार्थ्यांची बुधवारी पुन्हा परीक्षा घेण्यात येणार आहे. त्यांना सोमवारपर्यंतच्या त्यांच्या नोंदणीकृत ईमेल आयडी किंवा मोबाईल क्रमांकावर प्रवेशपत्रासंदर्भातील माहिती पाठविण्यात येईल, असे राज्य सामाईक प्रवेश परीक्षा कक्षाचे आयुक्त दिलीप सरदेसाई यांनी सांगितले.