अंथरुणाला खिळलेल्या रुग्णांसाठी लसीकरणाची सुविधा

अंथरुणाला खिळून असलेले रुग्ण व वयोवृद्धांना घरी जाऊन आरोग्य पथकाने लस द्यावी, यासाठी उच्च न्यायालय आग्रही होते. त्यामुळे हा निर्णय घेण्यात आला आहे. राज्यात ज्या व्यक्ती अंथरुणाला खिळून आहेत व पुढील सहा महिने परिस्थिती तशीच राहण्याची शक्यता असेल, अशा व्यक्तींचे लसीकरण करण्यासाठी ही विशेष सुविधा आहे. अशा व्यक्तींची नावे व पत्ता, संपर्क क्रमांक, अंथरुणाला खिळून असण्याचे कारण आणि सदरची व्यक्ती, रुग्ण लसीकरण करून घेण्यास पात्र असल्याचे डॉक्टरांचे वैद्यकीय प्रमाणपत्र इत्यादी माहिती covidvaccsbedridden@gmail.com  यावर पाठविण्याचे आवाहन आरोग्य विभागाने केले आहे.

ठाणे जिल्ह्यात आज लसीकरण बंद

ठाणे : जिल्ह्यात मागील काही दिवसांपासून लशींचा तुटवडा असतानाच, शनिवारी जिल्ह्याला ३० हजार ६८० लशींचा साठा प्राप्त झाला आहे. रविवारी अंबरनाथ शहरातील एका केंद्रावर लसीकरण सुरू राहणार आहे. तर ठाणे, कल्याण – डोंबिवली, भिवंडी, उल्हासनगर, बदलापूर आणि ठाणे ग्रामीण भागातील लसीकरण केंद्रे बंद राहणार आहेत. या भागातील केंद्रे सोमवारी पुन्हा सुरू होतील, असे महापालिका आणि जिल्हा परिषद प्रशासनाकडून सांगण्यात आले.