स्कॅम २००३ – द तेलगी स्टोरी’ ही वेबमालिकेचे प्रदर्शन थांबवण्याची कोट्यवधी रुपयांच्या मुद्रांक घोटाळ्याचा मुख्य सूत्रधार अब्दुल करीम तेलगी याच्या कुटुंबीयांनी केलेली मागणी मुंबईतील शहर दिवाणी न्यायालयाने शुक्रवारी फेटाळली. मुद्रांक घोटाळा आणि त्याचा सूत्रधार असलेल्या तेलगी याच्या जीवनावर आधारित वेबमालिकेच्या निर्मात्यांविरुद्ध तेलगी याची मुलगी सना इरफान हिने दिवाणी न्यायालयात धाव घेतली होती. तसेच २५ डिसेंबर रोजी ओटीटीवरील या वेबमालिकेचे प्रदर्शन थांबविण्याची अंतरिम मागणी केली होती. सना आणि वेबमालिकेचे निर्माते यांची बाजू ऐकल्यानंतर न्यायालयाने गुरूवारी सना हिच्या अर्जावरील निर्णय राखून ठेवला होता. शुक्रवारी न्यायालयाने सनाची अंतरिम मागणी फेटाळली.

या बातमीसह सर्व प्रीमियम कंटेंट वाचण्यासाठी साइन-इन करा
Skip
या बातमीसह सर्व प्रीमियम कंटेंट वाचण्यासाठी साइन-इन करा

हेही वाचा– मुंबई : मोडक सागर धरणाची दुरुस्ती ; धरण सुरक्षा संघटनेचा मुंबई महानगरपालिकेला अहवाल सादर 

सना हिने तेलगी कुटुंबीयांच्यावतीने हा दावा दाखल केला होता. या वेबमालिकेसाठी आमच्या कुटुंबीयांची परवानगी घेण्यात आली नाही, असा आरोप सना हिने केला होता. या वेबमालिकेचे निर्माते ॲप्लॉज एंटरटेन्मेंट प्रायव्हेट लिमिटेडचे संचालक हंसल मेहता, सरव्यवस्थापक प्रसून गर्ग आणि सोनी लाईव्ह यांच्याविरुद्ध हा दावा केला होता.

हेही वाचा- नाताळच्या दिवशी मध्य रेल्वेवर मेगाब्लॉक; पश्चिम रेल्वेवर शनिवारी रात्रकालीन ब्लॉक

ही वेबमालिका एका पुस्तकावर आधारित आहे. मात्र या पुस्तकातील तथ्यांमध्ये विसंगती आहे. या पुस्तकातील आपल्या वडिलांच्या व्यक्तिरेखेचे चित्रण खोटे, निराधार, अपमानास्पद, आक्षेपार्ह, अप्रिय, अत्यंत बदनामीकारक आहे. आमची, आमच्या कुटुंबाची आणि आमच्या मृत वडिलांची बदनामी करण्याच्या उद्देशाने या वेबमालिकेची निर्मिती केली गेली आहे. त्याचप्रमाणे या वेब मालिकेमुळे आमच्या कुटुंबाच्या गोपनीयतेच्या अधिकाराचे उल्लंघन होत आहे. ही वेब मालिका प्रदर्शित झाल्यास आमचे कधीही भरून न येणारे नुकसान होईल, असा दावा सना हिने केला होता.