लोकसत्ता खास प्रतिनिधी मुंबई: क्रिकेट प्रशिक्षणातून काढून टाकण्याची धमकी देऊन अल्पवयीन मुलीबरोबर अश्लील चाळे करणाऱ्या शाळेतील क्रिकेट प्रशिक्षकाला देवनार पोलिसांनी गुरूवारी अटक केली. त्याच्याविरोधात विनयभंग व बालकांचे लैंगिक अपराधांपासून संरक्षण कायदयांतर्गत (पोक्सो) देवनार पोलीस ठाण्यात गुन्हा दाखल करण्यात आला आहे. मूळचा औरंगाबाद येथील रहिवासी असलेल्या ३३ वर्षीय क्रिकेट प्रशिक्षकाला देवनार पोलिसांनी गुरूवारी अटक केली. आरोपीने २६ ऑगस्ट रोजी शाळेच्या मैदानाशेजारी असलेल्या खोलीत पीडित मुलीशी अश्लील चाळे केले. त्याला विरोध केला असता प्रशिक्षणातून काढून टाकण्याची धमकी दिली. हेही वाचा. प्रशासकीय इमारतीत जाणाऱ्या तरूणाकडे चाकू, मरीन ड्राईव्ह पोलीस ठाण्यात गुन्हा दाखल पीडित मुलीने हा प्रकार कुटुंबियांना सांगितल्यानंतर प्रथम रायगड पोलिसांकडे याप्रकरणी गुन्हा दाखल करण्यात आला होता. पण गुन्हा देवनार पोलिसांच्या हद्दीत घडल्यामुळे पोलिसांनी तो देवनार पोलिसांकडे वर्ग केला. आरोपींनी इतर मुलींबाबतही असे प्रकार केले होते का, याबाबत पोलीस तपास करत आहेत.