मेट्रो पर्यटनासाठी झुंबड!

किरण सातव हे आपली आई, पत्नी आणि मुलांसह थेट उल्हासनगरहून मेट्रो रेल्वेच्या प्रवासासाठी आले होते. मेट्रो रेल्वेचा प्रवास खूपच सुखद असल्याची आणि असे प्रकल्प आणखी व्हावेत, अशी प्रतिक्रिया सातव यांनी दिली.

नरेंद्र दवे हे आपला मुलगा विशाल याच्यासह अंधेरीहून घाटकोपरला मेट्रो रेल्वेने आले. सुटीच्या दिवशी मेट्रो रेल्वे सुरू होत आहे. हा वातानुकूलित प्रवासाचा अनुभव घेण्यासाठी आलो. छान वाटले. मुंबईच्या लोकलही अशाच गार झाल्या तर किती छान होईल, अशी अपेक्षा दवे यांनी बोलून दाखवली.

वेळेआधीच प्रवाशांसाठी सुरू
मेट्रो रेल्वेचे उद्घाटन झाल्यानंतर दुपारी एक वाजल्यापासून ती सर्वसामान्य मुंबईकरांच्या सेवेत दाखल होईल, अशी घोषणा ‘मुंबई मेट्रो वन प्रा. लि.’च्या अधिकाऱ्यांनी शनिवारी केली होती. मात्र, सकाळीपासूनच वसरेव्यापासून ते घाटकोपपर्यंतच्या विविध स्थानकांवर मुंबईकरांनी मेट्रोच्या प्रवासासाठी गर्दी केली. त्यामुळे मुख्यमंत्र्यांनी उद्घाटन केल्यानंतर लगेचच १०.२५ वाजता घाटकोपरहून तर १०.४० वाजता वसरेव्याहून मुंबईकरांसाठी मेट्रो रेल्वे सुरू करण्यात आली.

मुंबई मेट्रोचा
४६ वर्षांचा प्रवास..!
मुंबईत मेट्रो रेल्वे सुरू करण्याबाबतचा विचार साठीच्या उत्तरार्धात सुरू झाला. ज्येष्ठ साहित्यिक-पत्रकार अरुण साधू यांना १९६७-६८ मध्ये भायखळा-सँडहर्स्ट रोडदरम्यान ‘मुंबई मेट्रो रेल्वे ऑफिस’ अशी पाटी दिसली. त्यांनी चौकशी केली आणि मुंबईत मेट्रो रेल्वे सुरू करण्याची तयारी असे वृत्त दिले. तेव्हापासून आता जून २०१४ उजाडल्यावर सुमारे ४६ वर्षांनी मुंबईत पहिली मेट्रो रेल्वे धावली. मेट्रो रेल्वे सुरू झाल्याच्या बातम्या वाहिन्यांवरून पाहत असताना रविवारी अरुण साधू यांना हा मुंबई मेट्रोचा प्रस्ताव आणि प्रत्यक्ष मेट्रो रेल्वे सुरू होण्यातील हा ४६ वर्षांचा प्रवास आठवला. मेट्रो रेल्वे सुरू झाली बरे झाले पण इतकी वर्षे लागली. अर्थात त्यावेळचा प्रस्ताव हा दक्षिण मुंबई आणि उपनगरे जोडणाऱ्या मेट्रो रेल्वेचा होता. बोरीबंदर ते कुर्ला असा मार्ग विचाराधीन होता. आता कुलाबा-सीप्झ ही तिसरी मेट्रो रेल्वे करण्याचे थाटत आहे. ती खऱ्या अर्थाने मुंबईतील दक्षिण-उत्तर प्रवासाची दगदग कमी करू शकेल, असे साधू यांनी सांगितले.

दोन जखमी
मुंबई मेट्रो रेल्वेतून प्रवास करण्यासाठी मेट्रो रेल्वेच्या सर्वच स्थानकांवर प्रचंड गर्दी उसळली होती. या दरम्यान सरकत्या जिन्यांवरून जाताना दोन जणांना किरकोळ दुखापत झाल्याचा प्रकार घडला. यात एक वृद्ध व्यक्ती आणि एका महिलेचा समावेश आहे. या दोघांवर प्राथमिक उपचार करून त्यांना घरी पाठविण्यात आले. मात्र ही घटना कोणत्या रेल्वे स्थानकावर घडली त्याची माहिती मिळू शकलेली नाही़