शर्टाने केला घात ग्राईंडरमध्ये अडकून कामगाराचा मृत्यू, मालकाविरोधात निष्काळजीपणाचा गुन्हा दाखल

मृत कामगाराचा चुलत भाऊ महेश यादव याच्या तक्रारीवरून याप्रकरणी दादर पोलीस ठाण्यात गुन्हा दाखल करण्यात आला आहे. तक्रारीनुसार, महेश यादव गेल्या पाच वर्षांपासून सचिन कोठेकर यांच्याकडे चायनीज खाद्यपदार्थांसाठी लागणारा कच्चा माल बनवण्याचे काम करीत होता. त्याच्यासोबत पाच जण तेथे काम करीत होते. चायनीज पकोडे बनवण्यासाठी पीठ मळणे, कोबी, फ्लॉवर बारीक करणे यासाठी नरिमन भाटनगर येथील अमर संदेश मंडळाजवळील एका खोलीमध्ये इलेक्ट्रीक ग्राईंडर ठेवला होता. गेल्या पाच वर्षांपासून यादवच ग्राईंडरवर काम करीत होता. आरोपी सचिन कोठेकरने शनिवारी कच्चा माल आणण्यासाठी सूरज यादवला पाठवले. बराच वेळ झाला तरी सूरज यादव परत आला नाही.

हेही वाचा…मुंबईच्या हवा प्रदूषणात पुन्हा वाढ, नेव्ही नगर कुलाबा येथील हवा ‘अतिवाईट’

चायनीज पकोड्याच्या गाडीवर कार्यरत असलेल्या सचिनला अखेर दूरध्वनी आला. दूरध्वनी करणाऱ्या व्यक्तीने सूरज ग्राईंडरमध्ये अडकल्याचे सांगितले. त्यामुळे सर्वनी घटनास्थळी धाव घेतली. सूरज ग्राईंडरमध्ये अडकला होता. त्याला ग्राईंडरमधून बाहेर काढण्याचा प्रयत्न केला. पण तो बाहेर निघाला नाही. अखेर अग्निशमनदलाच्या जवानांना पाचारण करण्यात आले. अग्निशमन दलाच्या जवानांनी सूरजला ग्राईंडरमधून बाहेर काढून रुग्णवाहिकेतून परळ येथील केईएम रुग्णालयात नेले. तेथे दाखल करण्यापूर्वीच त्याचा मृत्यू झाल्याचे डॉक्टरांनी जाहीर केले. सूरजला ग्राईंडर चालवण्याचा कोणताही अनुभव नसताना त्याला त्यातून कच्चा माल काढण्यास सांगितले. त्यामुळे सूरजचा मृत्यू झाल्याचा आरोप तक्रारीत करण्यात आला आहे. याप्रकरणी मालक सचिन कोठेकरविरोधात गुन्हा दाखल करण्यात आला असून दादर पोलीस याप्रकरणी अधिक तपास करीत आहेत.