सनदी लेखापाल अंबर दलाल गैरव्यवहार प्रकरण : ईडीकडून ३६ कोटींच्या मालमत्तेवर टाच

ईडीने याप्रकरणात मुंबई व कोलकात्यातील १० स्थावर मालमत्ता, तसेच मुदत ठेवी, शेअर्स, म्युच्युअल फंडांचा समावेश आहे. ईडीने नुकतेच याप्रकरणात मुंबई अनेक ठिकाणी छापे टाकले होते. या कारवाईत आतापर्यंत १०४ कोटी रुपयांच्या मालमत्तेवर टाच आणली आहे. त्यात दुबईतील घराचाही समावेश आहे. दलालला याप्रकरणी आर्थिक गुन्हे शाखेने व त्यानंतर ईडीने अटक केली होती. याप्रकरणी आरोपपत्रही दाखल करण्यात आले आहे. ईडीसह मुंबई पोलीसही आरोपीविरोधात तपास करत आहेत.

एप्रिल २०२३ मध्ये एका मैत्रिणीने मुख्य तक्रारदार बबिता मलकानी यांची आरोपी अंबर दलालशी ओळख करून दिली होती. त्याने कामोडीटी ट्रेडिंग करून गुंतवणुकीवर आकर्षक नफा देऊ केला. तसेच प्रत्येक महिन्याला १.५ ते १.८ टक्के परतावा देण्याचे आश्वासन दिले. तक्रारदार महिलेने गुंतवणूक केली आणि तिला वचन दिलेले परतावे मिळाल्यावर तिने आणखी गुंतवणूक केली. एप्रिल २०२३ ते मार्च २०२४ आरोपीने अनेकांची फसवणूक केली. दलालला आर्थिक गुन्हे शाखेने देहरादून येथून अटक केली होती.

सध्या तो न्यायालयीन कोठाडीत आहे. आरोपीने चांदी, सोने, क्रूड ऑईल या सारख्या कमोडिटीमध्ये ट्रेडिंग करून दलालने प्रत्येक महिन्याला १.५ ते १.८ टक्के परतावा देण्याचे आश्वासन दिले होते. त्यासाठी अनेकांशी करारही केले होते. विश्वास संपादन करण्यासाठी पीपीटीद्वारे सादरीकरण करून दलाल गुंतवणूकदारांचा विश्वास संपादन करायचा. याप्रकरणात आतापर्यंत भारतातील २००९ गुंतवणूकदारांची फसवणूक केली आहे. पण प्रत्यक्षात या प्रकरणाचा आवाका मोठा आहे.

आरोपीने दुबई व अमेरिकेतही कंपन्या स्थापन करून तेथील गुंतवणूकदारांकडूनही मोठी रक्कम घेतल्याचा संशय आहे. विनय मोहिंदर या व्यक्तीने त्याला परदेशी गुंतवणूकदार मिळवून देण्यात मदत केली आहे. त्यामुळे भविष्यात परदेशी यंत्रणाही या प्रकरणातील तपासात सहभागी होण्याची शक्यता आहे. अंबर दलालने दुबईतील एक सदनिकेची माहितीही मिळाली होती. आरोपीने त्याच्या विक्रीचा प्रयत्न केला होता. सध्या हा व्यवहार थांबवण्यात आला. त्या सदनिकेवरही टाच आमण्यात आली आहे. अमेरिका व दुबईतील गुंतवणूकदारांची फसवणूक झाल्याने याप्रकरणात परदेशी यंत्रणाही सहभागी होण्याची शक्यता आहे.