मुंबई : अमलीपदार्थ न दिल्याने संतप्त झालेल्या एका तृतीयपंथीने ३४ वर्षीय तरुणाला बेदम मारहाण केल्याची घटना गोवंडीच्या शिवाजी नगर परिसरात घडली. या घटनेत गंभीर जखमी झालेल्या तरुणाचा मृत्यू झाला असून शिवाजी नगर पोलिसांनी याप्रकरणी गुन्हा दाखल करून आरोपीला अटक केली.
गोवंडीतील शिवाजी नगर परिसरात वास्तव्यास असलेला अतिक अन्सारी अंमलीपदार्थांच्या आहारी गेला होता. तो मंगळवारी अंमलीपदार्थ सेवन करीत असताना तृतीयपंथी सुमित्रा उर्फ चिन्नी (३१) तेथे आला. चिन्नीने अतिककडे अंमलीपदार्थाची मागणी केली. मात्र अतिकने ते देण्यास नकार दिला. त्यावरून दोघांमध्ये वाद झाला. वादाचे पर्यवसन हाणामारीत झाले. या मारामारीत अतिक गंभीर जखमी झाला. नातेवाईकांनी अतिकला तात्काळ रुग्णालयात दाखल केले. मात्र उपचारापूर्वीच त्याचा मृत्यू झाला. अतिकच्या भावाने केलेल्या तक्रारीवरून शिवाजी नगर पोलिसांनी चिन्नीविरोधात हत्येचा गुन्हा दाखल करून त्याला अटक केली.
