Devendra Fadnavis: दादरमधील हनुमान मंदिराबाबत राज्य सरकारची नेमकी भूमिका काय? देवेंद्र फडणवीसांनी केलं स्पष्ट!

नेमका काय आहे वाद?

दादर स्थानकावर पुनर्विकासाची कामं करण्याचा प्रकल्प रेल्वे प्रशासनाकडून हाती घेण्यात आला आहे. त्यायचाच एक भाग म्हणून मध्य रेल्वेवरील दादर स्थानकाच्या पूर्वेकडे असणारं जवळपास ८० वर्षं जुनं हनुमान मंदिर हटवण्याचा निर्णय घेण्यात आला. त्यासाठी मंदिर प्रशासनाला रेल्वेकडून नोटीस बजावण्यात आली. मात्र, याला स्थानिकांबरोबरच राजकीय विरोधकांनीही तीव्र विरोध केला. उद्धव ठाकरेंनी पत्रकार परिषद घेऊन या नोटिशीबद्दल सत्ताधाऱ्यांवर परखड शब्दांत टीका केली.

नोटिशीला स्थगिती

दरम्यान, नोटिशीचा मुद्दा तापल्यानंतर भाजपा आमदार मंगलप्रभात लोढा यांनी नोटिशीला रेल्वेकडून स्थगिती देण्यात आल्याची माहिती माध्यमांना दिली. तसेच, गेल्या दोन दिवसांपासून रेल्वे प्रशासनाच्या अधिकाऱ्यांशी याबाबत संपर्कात असून मंदिराशी संबंधित कागदपत्रांची तपासणी केल्यानंतर मंदिर हटवण्याच्या निर्णयाला स्थगिती देण्यात आल्याचं लोढा म्हणाले.

Dadar Hanuman Temple : दादरमधील हनुमान मंदिर हटवण्याच्या निर्णयाबाबत मोठी माहिती, मंगलप्रभात लोढा म्हणाले…

देवेंद्र फडणवीसांनी मांडली सविस्तर भूमिका

या सर्व घडामोडींवर मुख्यमंत्री देवेंद्र फडणवीस यांनी सविस्तर भूमिका मांडली आहे. पुण्यामध्ये आयोजित पुस्तक महोत्सवासाठी देवेंद्र फडणवीस उपस्थित होते. त्यावेळी त्यांनी यावर प्रतिक्रिया दिली. “न्यायालयाने याआधी निर्णय देऊन मंदिरांच्या श्रेणी केल्या आहेत. जुनी मंदिरं त्या श्रेणीनुसार नियमित करता येतात. त्यामुळे रेल्वे प्रशासनाशी चर्चा करून आम्ही त्यातून नक्कीच मार्ग काढू. नियमातील तरतुदीनुसार त्या मंदिराचं नियमितीकरण आपण करून घेऊ”, असं देवेंद्र फडणवीसांनी यावेळी स्पष्ट केलं. त्यामुळे दादरमधील या मंदिराचंही नियमितीकरण होणार असल्याचं आता स्पष्ट झालं आहे.