मुंबई : पैशांअभावी उपचार करण्यास नकार दिल्याने गर्भवती महिलेच्या मृत्यूप्रकरणी दीनानात मंगेशकर रुग्णालयातील प्रसूतीतज्ज्ञ डॉ. सुश्रुत घैसास यांची पुढील आठवड्यामध्ये महाराष्ट्र वैद्यकीय परिषदेकडून (एमएमसी) सुनावणी घेण्यात येणार आहे. यावेळी मृत महिलेच्या कुटुंबियांनाही बाेलविण्यात येणार असून, दोन्ही पक्षांची समोरासमोर चौकशी करण्यात येणार आहे. दरम्यान, मागील आठवड्यात एमएमसीने बजावलेल्या नोटीसीवर डॉ. घैसास यांनी सोमवारी स्पष्टीकरण सादर केले.
पुण्यातील दीनानाथ मंगेशकर रुग्णालयामध्ये एका गर्भवती महिलेच्या कुटुंबीयांना अनामत रक्कम भरणे शक्य न झाल्याने उपचार करण्यात आले नाहीत. परिणामी, या महिलेचा मृत्यू झाल्याने पुण्यासह राज्यभरात पडसाद उमटले. या प्रकरणी महाराष्ट्र वैद्यकीय परिषदेने डॉ. सुश्रुत घैसास यांना नोटीस बजावून स्पष्टीकरण मागविले होते. डॉ. घैसास यांनी स्पष्टीकरण सादर केल्यानंतर त्याची चौकशी करण्यासाठी एमएमसीकडून चौकशी समिती नेमण्यात आली आहे. या समितीसमोर पुढील आठवड्यात डॉ. घैसास यांची सुनावणी होणार आहे. यावेळी मृत गर्भवती महिला तनिषा हिच्या कुटुंबियांनाही बोलविण्यात येणार आहे. तक्रारदार व डॉ. घैसास यांची एमएमसीच्या समितीमार्फत समोरासमोर सुनावणी घेण्यात येणार आहे. या सुनावणीनंतर डॉ. घैसास यांच्या संदर्भात समितीमार्फत देण्यात येणाऱ्या निर्णयावर कारवाई करण्यात येणार असल्याची माहिती महाराष्ट्र वैद्यकीय परिषदेचे प्रशासक डॉ. विंकी रुघवानी यांनी दिली. दरम्यान, तक्रारदार व डॉ. घैसास यांना सुनावणीला बोलविण्याचा दिवस अद्याप निश्चित झालेला नाही. मात्र लवकरच तो दिवस निश्चित करण्यात येईल, असेही त्यांनी सांगितले.
दरम्यान, पैशांअभावी उपचार करण्यास नकार दिल्याने गर्भवती महिलेच्या मृत्यूप्रकरणी एमएमसीकडून सुरूवातीला दीनानाथ मंगेशकर रुग्णालय प्रशासनाला नोटीस पाठविली होती. यामध्ये संबंधित प्रकरणाची सविस्तर माहिती रुग्णालय प्रशासनाकडून मागविण्यात आली होती. रुग्णालय प्रशासनाने परिषदेला दिलेल्या उत्तरामध्ये प्रकरणाची सविस्तर माहिती दिली असून, यामध्ये डॉ. सुश्रुत घैसास यांच्याकडे हे प्रकरण असल्याचे नमूद करण्यात आले होते. त्यामुळे परिषदेने डॉ. सुश्रुत घैसास यांना आपली बाजू मांडण्यासंदर्भात गेल्या गुरूवारी नोटीस पाठवून सोमवारपर्यंत स्पष्टीकरण देण्याच्या सूचना करण्यात आली होती. डॉ. सुश्रुत घैसास यांनी स्पष्टीकरण सादर केल्यानंतर तपासासाठी चौकशी समितीची नियुक्ती करण्यात आली आहे.
काय आहे प्रकरण
प्रसूतीचा त्रास होत असलेल्या तनिषा भिसे यांना दीनानाथ मंगेशकर रुग्णालयात दाखल करण्यासाठी आणण्यात आले होते. रुग्णालय प्रशासनाने उपचारासाठी रुग्णाच्या नातेवाईकांना १० लाख रुपये भरण्यास सांगितले. मात्र, तीन लाख रूपये देतो, असे सांगूनही तनिषा भिसे यांच्यावर उपचार सुरू केले नाहीत. पैसे नसल्याने रुग्णालयाच्या प्रवेशद्वारावरूनच गर्भवती महिलेला परत पाठवले. ऐनवेळी त्यांना रुग्णवाहिका मिळू शकली नाही. परिणामी, योग्य वेळी उपचार न मिळाल्याने तनिषा भिसे यांचा मृत्यू झाला, असा आरोप तिच्या कुटुंबियांनी रुग्णालय प्रशासनावर केला होता. याप्रकरणी सरकारने नेमलेल्या समितीने दीनानाथ मंगेशकर रुग्णालय प्रशासनावर ठपका ठेवला आहे. यानंतर वादाच्या भोवऱ्यात अडकलेले डॉ. सुश्रुत घैसास यांनी राजीनामा दिला. या प्रकरणामुळे पुण्यासह राज्यातील सर्वसामान्य नागरिकांमध्ये संताप व्यक्त करण्यात येत आहे.
