मुंबई : आतापर्यंत १ जानेवारी किंवा तत्पूर्वी वयाची १८ वर्षे पूर्ण केलेल्या नागरिकांना मतदारयादीत नोंदणी करता येत होती. मात्र, आता २०२३ पासून जानेवारी, एप्रिल, जुलै आणि ऑक्टोबर या महिन्यांच्या १ तारखेला किंवा तत्पूर्वी वयाची १८ वर्षे पूर्ण करणाऱ्या युवकांना आधीच मतदार म्हणून नोंदणी करण्याचीही सुविधा निवडणूक आयोगाने उपलब्ध केल्याची माहिती जिल्हाधिकारी निधी चौधरी यांनी दिली.
हेही वाचा >>> मुंबई : ॲक्सिस बँकेची फसवणूक करणाऱ्या सराफाला अटक
भारत निवडणूक आयोगाने मतदारयाद्या सुधारित करण्यासाठीचा ‘विशेष संक्षिप्त पुनरिक्षण कार्यक्रम २०२३’ हाती घेतला आहे. त्याअंतर्गत उपनगर जिल्हाधिकारी कार्यालयाने जनजागृती रॅलीचे आयोजन केले होते. निधी चौधरी यांच्या हस्ते हिरवा झेंडा दाखवून या रॅलीला सुरुवात करण्यात आली होती. या प्रभात फेरीच्या समारोपप्रसंगी उपस्थितांशी संवाद साधताना जिल्हाधिकारी बोलत होत्या.
१ जानेवारी २०२३ रोजी वयाची १८ वर्षे पूर्ण होत असलेल्यांची नवीन मतदार म्हणून नोंदणी करण्यात येणार असून १ ऑक्टोबर २०२३ पर्यंत वयाची १८ वर्षे पूर्ण होत असलेले युवक नवीन मतदार नोंदणीसाठी आगाऊ अर्ज करू शकणार आहेत. यामुळे युवकांना वयाची १८ वर्षे पूर्ण होताच मतदानाचा अधिकार प्रत्यक्ष स्वरूपात प्राप्त होईल, असे चौधरी म्हणाल्या.
हेही वाचा >>> मुंबईः निलंबित उपायुक्त सौरभ त्रिपाठी यांचा गुन्हे शाखेने जबाब नोंदवला
पूर्वी वर्षातून एकदा अथवा निवडणुकीपूर्वी काही कालावधी आधी मतदारयादीमध्ये नाव नोंदणी करता येत होती. मात्र, आता वर्षातून चार वेळा मतदारयादीमध्ये नाव नोंदणी करण्याची सुविधा उपलब्ध करून देण्यात आली आहे. छायाचित्रासह प्रारूप मतदारयादी ९ नोव्हेंबरला प्रसिद्ध झाली असून सर्व मतदारांनी या यादीत आपले नाव असल्याची खातरजमा आवर्जून करून घ्यावी. ही यादी विधानसभा मतदारसंघाच्या मध्यवर्ती कार्यालयात अवलोकानार्थ उपलब्ध असणार आहे.
यासंदर्भात दावे व हरकती ९ नोव्हेंबर ते ८ डिसेंबर २०२२ या कालावधीत स्वीकारण्यात येतील. तसेच ५ जानेवारी २०२३ रोजी अंतिम मतदारयादी प्रसिध्द करण्यात येणार आहे. मतदारयादीच्या विशेष संक्षिप्त पुनरिक्षण कार्यक्रमानुसार १२ व १३ नोव्हेंबर रोजी दिव्यांग व महिलांसाठी आणि २६ व २७ नोव्हेंबर रोजी तृतीयपंथी व देह व्यवसाय करणाऱ्या महिला, भटक्या व विमुक्त जमातीच्या व्यक्तींची मतदार म्हणून नाव नोंदणी करण्यासाठी विशेष मोहीम राबविण्यात येणार आहे.
