सहाशे कोटी कूट चलन गैरव्यवहार; ईडीकडून मुंबई, दिल्ली व जयपूरमध्ये छापे

ईडीने एका वृत्तपत्राच्या अहवालावर आधारित तपास सुरू केला. त्यानुसार चिराग तोमर सध्या अमेरिकेत २० दशलक्ष डॉलर्सपेक्षा जास्त रकमेच्या फसवणुकीसाठी तुरुंगवास भोगत आहे. त्याने आणि त्याच्या सहकाऱ्यांनी कॉईनबेस कूट चलन एक्स्चेंजची हुबेहूब नक्कल असलेले कॉईनबेसप्रो नावाचे बनावट संकेतस्थळ तयार केले होते. त्यावर कूट चलन धारकाने लॉगिन करण्याचा प्रयत्न केला असता त्यात त्रुटी दाखवण्यात यायच्या. त्यानंतर संबंधीत व्यक्ती संकेतस्थळावर दिलेल्या मदत क्रमांकावर संपर्क साधायचा. तो दूरध्वनी तोमर चालवत असलेल्या कॉल सेंटरला जायचा. त्यानंतर कूट चलना धारकाकडून गोपनीय माहिती मिळवून आरोपी संबंधीत व्यक्तीच्या कूटचलन वॉलेटमध्ये प्रवेश करायचे व त्यानंतर संबंधीत कूट चलन इतर ठिकाणी हस्तांतरीत केले जायचे. अशा प्रकारे आरोपीने जगभरात अनेकांची फसवणूक केल्याचा संशय आहे.

फसवणूकीतून मिळालेले कूट चलन इतर एक्स्चेंजच्या माध्यमातून विकले जायचे. त्यानंतर भारतीय कूटचलन एक्स्चेंजच्या माध्यमातून संबंधीत रक्कम भारतीय चलन म्हणजेच रुपयांमध्ये रुपांतरीत केली जायची. या प्रकरणातून सुमारे १५ कोटी रुपये मिळवण्यात आले असून त्यातील काही रक्कम तोमरच्या कुटुंबीयांकडे वर्ग झाल्याची माहिती ईडीला मिळाली आहे. याप्रकरणी ईडीने तोमरच्या कुटुंबिय व साथीदारांची बँक खाती गोठवली आहेत. याप्रकरणात आतापर्यंत दोन कोटी १८ लाख रुपये गोठवण्यात आल्याचे ईडीकडून सांगण्यात आले. अशाच प्रकारच्या फसवणुकीद्वारे संशयास्पद कूट चलन विक्री आणि रुपयांमध्ये रूपांतरित करण्याचे व्यवहार सुरू होते, अशी माहिती ईडीला छाप्यांदरम्यान मिळाली आहे. डिसेंबर २०२३ मध्ये चिराग तोमरला अटलांटा विमानतळावर अमेरिकन अधिकाऱ्यांनी अटक केली. त्याने २० मे २०२४ रोजी हा गैरव्यवहार केल्याचे कबूल केले. त्यानंतर त्याला फेडरल ब्युरो ऑफ प्रिझन्सच्या ताब्यात ठेवण्यात आले. याप्रकरणी ईडी अधिक तपास करत असून गैरव्यवहारातील रकमेचे लाभार्थी व रकमेची माहिती घेतली जात आहे. काही महत्त्वाचे पुरावे या छाप्यांदरम्यान ईडीच्या हाती लागले आहेत. त्याद्वारे अधिक तपास सुरू असल्याचे ईडीकडून सांगण्यात आले.