दादर स्थानकात सहा क्रमांक फलाटातून प्रवेशबंदी; महापरिनिर्वाण दिनानिमित्त मध्य आणि पश्चिम रेल्वेवर लोहमार्ग पोलिसांचे नियोजन

सहा क्रमांकाच्या फलाटातून प्रवेशास मनाई असल्याने प्रवाशांना थेट हिंदमाता येथील महानगरपालिकेच्या पुलाचा वापर करून सहा क्रमांकाच्या फलाटात येऊन सीएसएमटीला जाणाऱ्या जलद लोकल पकडता येणार आहेत. मधला मोठा पादचारी पूल केवळ लोकल आणि मेल एक्स्प्रेसने स्थानकात उतरणाऱ्या प्रवाशांना पूर्व-पश्चिममेकडे शहर हद्दीत जाण्याकरिता तसेच दादर मध्य रेल्वेवरील एका फलाटातून पश्चिम रेल्वेच्या दुसऱ्या फलाटात जाण्याकरिता खुला राहणार आहे.

हेही वाचा >>> शिक्षण सेवकांच्या मानधनात वाढ ; प्रस्ताव मंजुरीसाठी वित्त विभागाकडे

याशिवाय मध्य आणि पश्चिम रेल्वे दादर स्थानकात उपनगरीय गाड्या आणि मेल-एक्स्प्रेस गाड्यांनी उतरणाऱ्या प्रवाशांना महानगरपालिका पुलाने पूर्व आणि पश्चिमकडे शहर हद्दीत बाहेर जाण्यासाठी बंदी घातली आहे. तसेच महानगरपालिकेच्या पादचारी पुलावर मध्य रेल्वेच्या दादर स्थानकातील परेल बाजूकडील जिना चढण्यास तसेच उतरण्याकरिता आणि माटुंगा दिशेकडील जिना फक्त चढण्याकरिता वापरता येणार असल्याचे लोहमार्ग पोलिसांनी सांगितले. दादर पश्चिम रेल्वे स्थानकाच्या फलाट क्रमांक एकवरील मधल्या मोठया पुलाच्या दक्षिणेकडील प्रवेशद्वार आणि उत्तरेकडील सुविधा गेट प्रवेशद्वार हे प्रवासी आणि अनुयायांना शहर हद्दीतून फलाटावर प्रवेश करण्यास बंद राहणार आहे. यासह अन्य उपाययोजना करतानाच लोहमार्ग पोलिसांचे मोठया प्रमाणात मनुष्यबळ तैनात असणार आहे.