चिकित्सक समूह शिरोळकर हायस्कूलची ‘इंडिया बुक ऑफ रेकॉर्ड्स’मध्ये नोंद

गिरगावमधील चिकित्सक समूह शिरोळकर हायस्कूल या मराठी माध्यमाच्या शाळेतील शिशुवर्गापासून ते दहावीपर्यंतचे विद्यार्थी, शिक्षक व शिक्षकेत्तर कर्मचारी अशा एकूण ८८६ जणांनी वैयक्तिकरित्या सूर्योदयापासून सूर्यास्तापर्यंत सलग मराठी गीतांचे सादरीकरण करीत शाळेचा परिसर मंत्रमुग्ध केला होता. विविध काळातील मराठी चित्रपट व नाट्यगीते, अभंग, भावगीते, भक्तिगीते, लोकगीते आदी मराठी गीतांनी गिरगावचा परिसर दुमदुमला होता. या कार्यक्रमाच्या निमित्ताने सकाळपासून सायंकाळपर्यंत विद्यार्थ्यांमध्ये उत्साहाचे वातावरण होते. सर्वांनी क्रमानुसार आणि शिस्तबद्ध पद्धतीने रंगमंचावर गीत सादर केले. तसेच शाळेच्या संपूर्ण आवारात केलेली सजावटही लक्षवेधी ठरली. कागदी मुळाक्षरे, ज्ञानपीठ पुरस्कार विजेते साहित्यिकांची छायाचित्रे लावण्यात आली होती. तसेच पुस्तकांचे गाव असलेल्या भिलारचाही देखावा उभारण्यासह मराठी साहित्यिकांची काही पुस्तकेही मांडण्यात आली होती.

या कार्यक्रमासंदर्भातील पूर्वकल्पनेनुसार ‘इंडिया बुक ऑफ रेकॉर्ड्स’च्या प्रतिनिधींनी उपस्थित राहून आणि संपूर्ण कार्यक्रमाचे निरीक्षण करून ८८६ मराठी गीतांच्या सलग सादरीकरणाची ‘इंडिया बुक ऑफ रेकॉर्ड्स’मध्ये नोंद केली. या विक्रमाचे प्रशस्तीपत्र व पदक शाळेच्या अधिकाऱ्यांकडे कार्यक्रमानंतर तात्काळ सुपूर्द करण्यात आले. यावेळी चिकित्सक समूह शिरोळकर हायस्कूल मराठी माध्यमाच्या मुख्याध्यापिका संचिता गावडे व पर्यवेक्षक संतोष मांजरेकर, शिक्षक नारायण गिते, चिकित्सक समूह संस्थेचे अध्यक्ष किशोर रांगणेकर आदी उपस्थित होते. तसेच संस्थेचे सचिव डॉ. गुरुनाथ पंडित यांच्या संकल्पनेतून हा कार्यक्रम सादर झाला.

‘चिकित्सक समूह शिरोळकर हायस्कूलमध्ये विविध कार्यक्रमांचे सातत्याने आयोजन करण्यात येते. मराठी गीतांचे सलग सादरीकरण हा त्यापैकीच एक महत्वाचा कार्यक्रम होता. गेल्या दोन महिन्यांपासून या कार्यक्रमाच्या दृष्टीने शाळेत जय्यत तयारी सुरु होती. मराठी गीतांचा सातत्याने सराव करण्यात आला. या ऐतिहासिक क्षणाचे साक्षीदार होण्यासाठी आणि सर्व विद्यार्थी, शिक्षक व शिक्षकेतर कर्मचाऱ्यांचा उत्साह वाढविण्यासाठी पालक, माजी विद्यार्थी आणि हितचिंतक आवर्जून उपस्थित होते. या सर्व मान्यवरांचे शाळेच्या बॅण्ड पथकाद्वारे स्वागत करण्यात आले’, अशी माहिती चिकित्सक समूह शिरोळकर हायस्कूलमधील शिक्षक नारायण गिते यांनी दिली.