मुंबई : शिवसेना (ठाकरे) पक्षाचे निष्ठावंत माजी नगरसेवक संजय घाडी आणि त्यांच्या पत्नी संजना घाडी यांनी उद्धव ठाकरे यांच्या पक्षाला जय महाराष्ट्र केला आहे. घाडी दांपत्याने उपमुख्यमंत्री एकनाथ शिंदे यांच्या शिवसेनेत रविवारी पक्षप्रवेश केला. संजना घाडी या ठाकरेंच्या पक्षात उपनेत्या आणि प्रवक्त्या होत्या. नुकतेच पक्षाने संजना यांना प्रवक्ते पदावरून हटवले होते.
शिवसेनेत फूट पडल्यानंतर गेल्या दोन अडीच वर्षात मुंबईतील ठाकरे गटाच्या माजी नगरसेवकांनी एक एक करत शिंदे यांच्या शिवसेनेत प्रवेश केला आहे. हा ओघ असाच सुरू असून येत्या महापालिका निवडणूकांच्या तोंडावर काठावर असलेले माजी नगरसेवक ठाकरे यांना जय महाराष्ट्र करून एकनाथ शिंदे यांच्या शिवसेनेत प्रवेश करीत आहेत. रविवारी १२ एप्रिल रोजी मागाठाणे मधील माजी नगरसेवक संजय घाडी आणि त्यांच्या पत्नी संजना घाडी यांनी शिंदे यांच्या शिवसेनेत प्रवेश केला. यावेळी त्यांच्यासोबत उप शाखाप्रमुख, गट प्रमुख, शाखाध्यक्ष आणि शेकडो कार्यकर्त्यांनी शिवसेनेचे मुख्य नेते आणि राज्याचे उपमुख्यमंत्री एकनाथ शिंदे यांच्या उपस्थितीत शिवसेनेत प्रवेश केला. यावेळी विधान परिषद उपसभापती आणि शिवसेना नेत्या आमदार डॉ. निलम गोऱ्हे उपस्थित होत्या. या पक्ष प्रवेशामुळे महापालिका निवडणुकीपूर्वी ठाकरे गटाची मागाठाणेतील ताकद कमी होणार असल्याचे बोलले जात आहे. पक्षप्रवेश करताच संजना घाडी यांची शिवसेना (शिंदे) पक्षाच्या उपनेते आणि प्रवक्तेपदी नियुक्ती करण्यात आली आहे.
खरी शिवसेना कोणाची हे जनतेला कळले आहे …एकनाथ शिंदे
या पक्षप्रवेशाच्यावेळी उपमुख्यमंत्री एकनाथ शिंदे म्हणाले की, मागील अडीच वर्षात सर्वसामान्यांना सोन्याचे दिवस आणण्याचे काम महायुती सरकारच्या माध्यमातून केले. एकीकडे विकास प्रकल्प आणि दुसरीकडे लोकाभिमुख योजना या दोघांची सांगड घालण्याचा प्रयत्न सरकारने केला. त्यामुळे विधानसभा निवडणुकीत राज्यातील जनतेने महायुतीला ऐतिहासिक विजय मिळवून दिला. या निवडणुकीत ८० जागा लढवून ६० जागा जिंकलो तर कोणी १०० जागा लढवून २० जागा जिंकल्या, यावरुन खरी शिवसेना कोणाची यावर जनतेने शिक्कामोर्तब केले. त्यांच्या आरोपाला आरोपातून नाही तर कामातून उत्तर दिले. बाळासाहेब म्हणायचे सत्ता येते, सत्ता जाते पण नाव जाता कामा नये, ते नाव टिकवण्याचे काम आपण केले, असे उपमुख्यमंत्री शिंदे म्हणाले. बाळासाहेब आणि धर्मवीर आनंद दिघे यांचे ८० टक्के समाजकारण आणि २० टक्के राजकाऱण या विचारानुसार आपले सरकार काम करतेय, असे उपमुख्यमंत्री शिंदे म्हणाले.
धनुष्यबाण हा आपला इमान …
ते पुढे म्हणाले की, मुंबईत १५ ते २० वर्षांपूर्वी जी कामे व्हायला हवी होती ती आपण मागील अडीच वर्षात सुरु केली. मुंबईत अटल सेतु, कोस्टल रोड झाला. बाळासाहेब ठाकरे आपला दवाखाना सुरु केला. महात्मा ज्योतिबा फुले जन आरोग्य योजनेची विमा सुरक्षा १.५ लाखांवरुन ५ लाख केली. हे काम करणारे सरकार आहे. ही काम करणारी शिवसेना आहे. धनुष्यबाण ही आपली निशाणी आहे. धनुष्यबाण आणि भगवा झेंडा हे आपले इमान आहे, श्वास आहे आणि आपला अभिमान आहे, असे उपमुख्यमंत्री शिंदे म्हणाले. शिंदे यांनी केलेल्या कामाने प्रभावित होत मूळ शिवसेनेत प्रवेश केला असे माजी नगरसेवक संजय घाडी यांनी यावेळी सांगितले.
माजी नगरसेवक नाना आंबोले यांचाही पक्षप्रवेश
शिवडीतील माजी नगरसेवक नाना आंबोले यांनीही शिंदे यांच्या शिवसेनेत यावेळी पक्षप्रवेश केला. नाना आंबोले हे मूळचे शिवसेनेचे नगरसेवक होते. त्यांनी काही वर्षांपूर्वी भाजपमध्ये प्रवेश केला होता. विधानसभा निवडणूकीसाठी त्यांना भाजपकडून उमेदवारी अपेक्षित होती. मात्र भाजपने उमेदवारी न दिल्यामुळे त्यांनी बंडखोरी केली होती. तेव्हापासून ते भाजपमध्ये नाराज होते. आंबोले यांनीही रविवारी शिंदे यांच्या शिवसेनेत प्रवेश केला. यावेळी नाना अंबोले यांची वरळी आणि शिवडी विधानसभा समन्वयकपदी नियुक्ती करण्यात आली.