मुंबई : पनवेल – कर्जत नवीन रेल्वे मार्गातील सर्वाधिक लांबीच्या वावर्ले बोगद्याचे खोदकाम पूर्ण झाले आहे. सध्या ठाणे – दिवादरम्यानचा पारसिक बोगदा मुंबई महानगरातील सर्वाधिक लांबीचा आहे.
मुंबईतील वाहतुकीवर ताण आल्याने प्रवाशांना प्रवास करणे गैरसोयीचे झाले आहे. त्यामुळे मुंबईवरून कर्जतला जाण्यासाठी आणखी एक रेल्वे मार्ग तयार करण्याचे काम सुरू आहे. या मार्गावरून पनवेल येथून थेट लोकलने कर्जत गाठणे शक्य होणार आहे. तसेच कर्जत हे मुंबई-पुण्याला जोडणारे ठिकाण आहे. त्यामुळे कर्जतमध्ये लोकवस्ती वाढत आहे. त्यामुळे कर्जतवरून जलद गतीने लोकलने जाता यावे, यासाठी पनवेल – कर्जत दुहेरी रेल्वेमार्गाचे काम सुरू आहे. येत्या दोन वर्षात हार्बर मार्गावरील सीएसएमटी स्थानकावरून पनवेलमार्गे थेट कर्जत गाठणे शक्य होणार आहे. मुंबई रेल्वे विकास महामंडळाच्या (एमआरव्हीसी) मुंबई नागरी परिवहन प्रकल्प ३ (एमयूटीपी-३) अंतर्गत पनवेल – कर्जत दुहेरी रेल्वेचे काम वेगात सुरू आहे. या रेल्वे मार्गात ३,१६४ मीटर लांबीचे नढाल, किरवली आणि वावर्ले असे तीन बोगदे आहेत. यापैकी नढाल येथील बोगद्याची लांबी २१९ मीटर आणि किरवली येथील बोगद्याची लांबी ३०० मीटर आहे.
५० टक्के काम पूर्ण
पनवेल-कर्जतदरम्यान सुमारे २९.६ किमी लांबीचा दुहेरी रेल्वे मार्ग तयार करण्यात येत आहे. या मार्गात दोन रेल्वे उड्डाणपूल, आठ मोठे पूल आणि ३६ लहान पूल उभारण्यात येणार आहेत. या मार्गिकेसाठी २,७८२ कोटी रुपये मंजूर झाले आहेत. सध्या एकूण ५० टक्के कामे पूर्ण झाली असून डिसेंबर २०२५ पर्यंत दुहेरी मार्गाचे काम पूर्ण करण्याचे लक्ष्य एमआरव्हीसीने ठेवले आहे.
हेही वाचा…मुंबई : १७ कोटींच्या फसवणुकीप्रकरणी सात जणांविरोधात गुन्हा
बोगद्याचे खोदकाम जून अखेरपर्यंत पूर्ण करण्याची कालमर्यादा होती. मात्र काटेकोर नियोजनामुळे ७ जून रोजीच खोदकाम पूर्ण केले. आता बोगद्यातील अन्य कामे करण्यात येणार आहेत. वावर्ले बोगदा तयार करताना न्यू ऑस्ट्रियन टनेलिंग पद्धतीचा वापर करण्यात आला आहे. – सुभाषचंद्र गुप्ता, अध्यक्ष व व्यवस्थापकीय संचालक, मुंबई रेल्वे विकास महामंडळ
