पहिल्या दिवशी बेस्टकडे पाच लाख नवे प्रवासी

मुंबई : शेअर रिक्षा, टॅक्सीचे प्रवासी पुन्हा बेस्टकडे वळवण्यात बेस्टला काही अंशी नक्कीच यश आले आहे. बेस्टच्या तिकीटदरात कपात केल्यामुळे बेस्टचे प्रवासी वाढले आहेत, पण उत्पन्न मात्र घटले आहे. बेस्टचे तब्बल ५ लाख २ हजार ८१३ प्रवासी एका दिवसात वाढले आहेत, परंतु ६६ लाख ९८ हजारांनी उत्पन्न घटले आहे. बेस्टने कमीतकमी तिकीट पाच रुपये केल्यामुळे प्रवाशांमध्ये प्रचंड उत्साह असून प्रत्यक्षात गाडय़ांचा ताफा वाढेपर्यंत हे प्रवासी टिकवून ठेवणे ही आता बेस्टसाठी कसोटी ठरणार आहे.

बेस्टला आर्थिक संकटातून वाचवण्यासाठी पालिका आयुक्त प्रवीण परदेशी यांनी बेस्टमध्ये भाडय़ाने गाडय़ा आणून ताफा वाढवण्याचा निर्णय मार्गी लावला. त्याचबरोबर प्रवाशांना बेस्टकडे वळवण्यासाठी बेस्टच्या तिकिटदरात कपात करून किमान पाच रुपये तिकीट करण्याचा धाडसी निर्णय त्यांनी घेतला. या निर्णयाची मंगळवार, ९ जुलैपासून अंमलबजावणी सुरू झाली. मरणासन्न अवस्थेत असलेल्या बेस्टला या निर्णयामुळे अक्षरश संजीवनी मिळाली आहे. या निर्णयामुळे बेस्टच्या २७ डेपोंमध्ये प्रवाशांची संख्या चांगलीच वाढल्याचे आकडेवारीवरून स्पष्ट झाले आहे. मात्र तिकीट निम्मे केल्यामुळे उत्पन्न घटले आहे.  तिकीट कपातीच्या या निर्णयाची अजून बऱ्याच जणांना माहिती नाही. तरीही प्रवाशांमध्ये झालेली वाढ ही बेस्ट उपक्रमाचा हुरूप वाढवणारी आहे.

बेस्टचे शटर बंद करायचे शिल्लक ठेवले

आजही बेस्टच्या बसगाडय़ांमध्ये संमिश्र प्रतिक्रिया ऐकायला मिळत होत्या. अनेक जण तिकीट कमी झाल्यामुळे पैसे वाचवण्यासाठी आवर्जून बसगाडीची वाट पाहत होते, तर बेस्ट जगली पाहिजे अशा मतांचेही काही प्रवासी होते. या साऱ्यापासून अनभिज्ञ असेही काही प्रवासी होते. सीएसएमटीकडून वर्ल्ड ट्रेड सेंटरकडे जाणाऱ्या बसमध्ये एका प्रवाशाने एलआयसीकडे जाण्याचे तिकीट मागितले व नेहमीप्रमाणे १० रुपये काढून कंडक्टरला देत होते. पाच रुपये कंडक्टरने परत केल्यानंतर गोंधळून त्या प्रवाशाने आपण कुठून चढलो ते परत सांगितले. त्यावर कंडक्टरने प्रवाशाला सांगितले, तिकीट कमी झालेय, मजा कर, बेस्टचे शटरच बंद करायचे शिल्लक राहिले आहे.

जास्तीच्या प्रवासासाठीही पाच रुपये 

पाच किमीसाठी पाच रुपये आणि त्यापुढे १० किमीपर्यंत १० रुपये अशी नवीन तिकीटरचना असताना अनेकांना तिकीट पाच रुपये झालेय एवढेच माहीत होते. त्यामुळे लांबच्या प्रवासासाठीही काही ठिकाणी प्रवासी पाच रुपये तिकिटाचा आग्रह धरत होते. त्यामुळे त्यांना समजावताना कंडक्टरला नाकीनऊ येत होते.

दिवस      प्रवासी  उत्पन्न (रु.)   

८ जुलै  १७,१५,४४०      २,१२,३३,२६०

९ जुलै  २२,१८,२५३      १,४५,३४,६९७

आगारनिहाय प्रवासीवाढ

ओशिवरा         ४७.७४ टक्के

घाटकोपर        ४४.२१ टक्के

मुलुंड               ४२.४२ टक्के

विक्रोळी           ३८.२७ टक्के

दिंडोशी            ३६.८४ टक्के