परदेशी वैद्यकीय पदवी परीक्षा जुलैमध्ये होण्याची शक्यता, पात्रता प्रमाणपत्रासाठी १० मार्चपासून अर्ज करता येणार

दरवर्षी अनेक विद्यार्थी वैद्यकीय शिक्षण घेण्यासाठी परदेशी जातात. यासाठी चीन व रशियामध्ये जाणाऱ्या विद्यार्थ्यांची संख्या अधिक आहे. वैद्यकीय शिक्षण पूर्ण झाल्यावर हे विद्यार्थी पुन्हा भारतामध्ये वैद्यकीय व्यवसाय करण्यासाठी येतात. मात्र पैशाच्या बळावर परदेशात पदवी घेऊन भारतात येणार्यांना आळा बसावा यासाठी राष्ट्रीय आयुर्विज्ञान आयोगाकडून या विद्यार्थ्यांची ‘परदेशी वैद्यकीय पदवी परीक्षा’ घेण्यात येते. तसेच परीक्षा उत्तीर्ण झाल्यावर या पदवीप्राप्त विद्यार्थ्यांना भारतामध्ये आंतरवासिता करणे बंधनकारक असते. या परीक्षेत उत्तीर्ण होण्याचे प्रमाण हे १२ ते १५ टक्के इतकेच असते.

महाराष्ट्रामध्ये दरवर्षी साधारणपणे १२००, तर देशातून १० हजार विद्यार्थी ही परीक्षा उत्तीर्ण होऊन आंतरवासिता करण्यासाठी येतात. परदेशातून वैद्यकीय शिक्षण पूर्ण करून भारतात येणाऱ्या विद्यार्थ्यांसाठी ही परीक्षा वर्षातून दोन वेळा घेतली जाते. त्यानुसार यंदा जुलैमध्ये ही परीक्षा होण्याची शक्यता आहे. या परीक्षेसाठी राष्ट्रीय आयुर्विज्ञान आयोगाने जारी केलेले पात्रता प्रमाणपत्र आवश्यक असते. या प्रमाणपत्रासाठी आयोगाकडून ऑनलाईन अर्ज मागविण्यात येतात. त्यानुसार १० मार्चपासून अर्ज करण्याच्या प्रक्रियेला सुरुवात होणार आहे. विद्यार्थ्यांना ९ एप्रिलपर्यंत अर्ज करता येणार आहे. उमेदवारांना आयोगाच्या संकेतस्थळावरील https://www.nmc.org.in/ActivitiWebClient/open/studentRaise या लिंकवर अर्ज करता येणार आहेत.

एफएमजीई परीक्षा देण्यासाठी आवश्यक असलेल्या पात्रता प्रमाणपत्रांसाठी अर्ज करण्याची ही शेवटची संधी आहे आणि त्यानंतर उमेदवारांना पात्रता प्रमाणपत्रांसाठी अर्ज करण्याची कोणतीही संधी उपलब्ध होणार नाही. तसेच ज्या अर्जदारांनी यापूर्वी प्रमाणपत्रासाठी अर्ज केला आहे, त्यांना पुन्हा अर्ज करण्याची आवश्यकता नाही. अपूर्ण अर्ज सरसकट नाकारण्यात येणार असल्याने सर्व उमेदवारांना आवश्यक नोंदी काळजीपूर्वक तपासून अर्ज सादर करावा, असे आवाहन आयोगाकडून करण्यात आले आहे.

पात्रता अर्जाच्या स्थितीबद्दल येथे चौकशी करू शकतात

अर्जदाराने आयोगाकडे पात्रता प्रमाणपत्रासाठी अर्ज केल्यानंतर अर्जाची स्थिती जाणून घेण्यासाठी त्यांना eligibility.regn@nmc.org.in आणि eligibility@nmc.org.in या ई-मेलद्वारे चौकशी करता येणार आहे. मात्र यासाठी उमेदवारांना त्यांचा नस्ती क्रमांक (फाईल ट्रॅकिंग क्रमांक) देणे आवश्यक आहे. फाइल ट्रॅकिंग क्रमांकाच्या अनुपस्थितीत उमेदवाराला कोणताही प्रतिसाद पाठविला जाणार नाही.