|| शैलजा तिवले
रुग्णसंख्या घटल्यामुळे महापालिकेचा निर्णय
मुंबई : मुंबईत करोनाचा प्रादुर्भाव कमी झाल्यामुळे जम्बो करोना रुग्णालयांमध्ये तुरळक रुग्ण दाखल आहेत. त्यामुळे गोरेगावचे नेस्को, मुलुंड रिचर्डसन अँड क्रूडास, कांजूरमार्ग आणि दहिसर ही जम्बो करोना रुग्णालये पूर्णपणे बंद करण्यात येणार आहेत.
दैनंदिन रुग्णसंख्येचा आलेखही कमी होऊन आता जवळपास दीडशेच्याही खाली आला आहे. उपचाराधीन रुग्णांची संख्याही एक हजारापर्यंत कमी झाली आहे. रुग्णालयात दाखल रुग्णांची संख्याही कमी झाली असून सध्या ७३९ रुग्ण दाखल आहेत, तर सुमारे ९८ टक्के खाटा रिक्त आहेत. शहरात करोना साथीच्या काळात सुरू केलेल्या नऊ जम्बो रुग्णालयातील खाटा मोठय़ा प्रमाणात रिक्त आहेत. अवाढव्य खर्च असलेली ही केंद्रे बंद होणार याबाबत चर्चा मागील काही दिवसांपासून सुरू होती. परंतु कोणती केंद्रे बंद होणार याबाबत ठोस निर्णय नव्हता. अखेर गुरुवारी पालिकेत झालेल्या बैठकीमध्ये चार जम्बो केंद्रे बंद करण्याच्या निर्णयावर शिक्कामोर्तब झाले. शहरात विभागवार एक जम्बो केंद्र सुरू ठेवण्याचा निर्णय पालिकेने घेतला आहे. त्यानुसार अंधेरी सेव्हनहिल्स रुग्णालय, वांद्रे कुर्ला संकुलातील जम्बो केंद्र, वरळीचे एनसीआय आणि भायखळय़ातील रिचर्डसन अँड क्रूडास आणि मालाड अशी चार जम्बो रुग्णालये सुरू राहणार आहेत.
सामग्री अन्य रुग्णालयामध्ये
बंद झालेल्या जम्बो करोना केंद्रातील सर्व उपकरणे आणि वैद्यकीय सामग्रीची यादी तयार केली जाईल. आवश्यकतेनुसार, उपनगरीय रुग्णालये , नव्याने झालेली रुग्णालये आणि वैद्यकीय महाविद्यालये येथे याचा पुरवठा केला जाईल, असे अधिकाऱ्यांनी सांगितले.
राज्यात १,१८२ नवे करोना बाधित
मुंबई : राज्यात दिवसभरात ११८२ नव्या रुग्णांची नोंद झाली असून १९ रुग्णांचा मृत्यू झाला. मुंबईत ११९नवे बाधित आढळले. राज्यात उपचाराधीन रुग्णसंख्या १०,२५० झाली आहे. राज्यात दिवसभरात ओमायक्रॉनचे ५८ रुग्ण आढळले.
ठाण्यात ५७ रुग्ण
ठाणे जिल्ह्यात गुरुवारी ५७ करोना रुग्ण आढळले, तर तीन रुग्णांचा मृत्यू झाला. ठाणे शहर २२, नवी मुंबई १४, मीरा-भाईंदर सहा, कल्याण-डोंबिवली पाच, ठाणे ग्रामीण चार, उल्हासनगर चार, अंबरनाथ आणि बदलापूरमध्ये प्रत्येकी एक रुग्ण आढळून आला आहे.
