मुंबई : मुलीला अमेरिकेत नोकरी लावण्याचे आमीष दाखवून ६६ वर्षीय व्यावसायिकाची सव्वाआठ कोटी रुपयांची फसवणूक केल्याप्रकरणी टिळक नगर पोलिसांनी दोघांविरोधात गुन्हा दाखल केला आहे. आरोपींमध्ये एका महिलेचा समावेश आहे.
तक्रारदार जयेश ठक्कर हे व्यावसायिक असून ते घाटकोपर येथील रहिवासी आहेत. आरोपी जय शहा व निशा दुसारा यांनी चेंबूर पश्चिम येथील एका हॉटेलमध्ये तक्रारदाची भेट घेतली होती. त्यावेळी ठक्कर यांची मुलगी श्रेया हिला अमेरिकेत नोकरी व ग्रीनकार्ड मिळवून देण्याचे आश्वासन जय आणि निशाने दिले होते. त्यामुळे आरोपींनी ठक्कर यांच्याकडून आठ कोटी ३३ लाख ८३ हजार रुपये घेतले. पण त्यानंतरी श्रेयाला अमेरिकेत नोकरी लावली नाही. तसेच तिला ग्रीनकार्ड मिळवून दिले नाही. तक्रारदार यांनी पैशांची मागणी केली असता आरोपींनी त्यांना रक्कम परत करण्याचे आश्वासन दिले. तसेच रक्कम परत केल्याचेही भासवले. त्यासाठी बँकेचे बनावट पत्र व स्टेटमेंटही सादर केली. २०१५ ते मार्च २०२२ या कालावधीत हा प्रकार सुरू होता. अखेर ठक्कर यांना आपली फसवणूक झाल्याचे लक्षात आले आणि त्यांनी याप्रकरणी टिळक नगर पोलिसांकडे तक्रार केली. पोलिसांनी याप्रकरणी भादंवि कलम ४२०, ४०६, ४६५, ४६८, ४७१ व ३४ अंतर्गत गुन्हा दाखल केला असून याप्रकरणी पोलीस अधिक तपास करीत आहेत.
