लोकसत्ता प्रतिनिधी
मुंबई: चेंबूरच्या वाशीनाका परिसरात बुधवारी रात्री स्वयंपाकाच्या गॅस सिलेंडरमधून झालेल्या गळतीमुळे घरात आग लागली. या आगीत एक वृद्ध व्यक्ती गंभीरित्या जखमी झाली असून त्यांच्यावर शीव रुग्णालयात उपचार सुरू आहेत.
चेंबूरच्या वाशी नाका परिसरातील म्हाडा कॉलनीतील इमारत क्रमांक ६ मध्ये बुधवारी रात्री ११ च्या सुमारास स्वयंपाकाच्या गॅस सिलिंडरमधून गळती होऊन आग लागली. नाफिर सय्यद (६०) यांच्या घरात ही आग लागली. आगीमुळे घरातील साहित्याचे नुकसान झाले स्थानिक रहिवाशांनी आगीची माहिती अग्निशमन दलाला दिली. त्यानंतर तात्काळ अग्निशमन दलाच्या दोन गाड्या आणि आरसीएफ पोलीस घटनास्थळी दाखल झाले. अग्निशमन दलाच्या जवानांनी काही वेळातच या आगीवर नियंत्रण मिळवले.
आणखी वाचा-बहुराज्यीय पतसंस्था घोटाळ्याच्या चौकशीला उपायुक्त नवटके यांच्याकडून सुरुवातीला नकार
या घरात अडकलेल्या नाफिर सय्यद यांना अग्निशमन दलाच्या जवानांनी बाहेर काढले आणि शीव रुग्णालयात दाखल केले. निफिर सय्यद ३० टक्के भाजले आहेत. वाशीनाका परिसर दाटीवाटीचा भाग आहे. मात्र अग्निशमन दलाच्या जवानांनी वेळीच आग आटोक्यात आणल्याने मोठी दुर्घटना टळली.
