मेट्रो ३ मार्गिकेत लावण्यात आलेल्या २००० हून अधिक झाडांचे जिओ टॅगिंग, क्यू आर कोड स्कॅन करत झाडांची संपूर्ण माहिती मिळणार

हेही वाचा >>> तळोजा कारागृहाचे वरिष्ठ तुरुंग अधिकारी व पोलीस शिपायाला अटक; १० हजारांची लाच घेतल्याचा आरोप, एसीबपीची कारवाई

मेट्रो ३ मार्गिकेसाठी आणि आरे कारशेडसाठी मोठ्या संख्येने झाडे कापण्यात आली आहेत. या झाडांच्या कत्तलीवरुन मोठा वादही निर्माण झाला आहे. नियमानुसार झाडे कापणाऱ्या यंत्रणेला कापण्यात आलेल्या झाडांच्या बदल्यात काही पट झाडे लावावी आणि ती जगवावी लागतात. अशावेळी एमएमआरसीकडून लावण्यात आलेल्या आणि पुनर्रोपित करण्यात आलेल्या झाडांबाबत वाद आहे. पर्यावरणप्रेमींकडून त्यावर नेहमीच आक्षेप घेतला जातो. या पार्श्वभूमीवर आता झाडांच्या पुनर्रोपण प्रक्रियेत पारदर्शकता यावी, एमएमआरसीने कुठे आणि कोणती झाडे लावली आहेत त्याची इत्यंभूत माहिती सर्वसामान्यांना उपलब्ध व्हावी यासाठी नव्याने लावण्यात आलेल्या झाडांसह पुनर्रोपित झाडांचे जिओ टॅगिंग करण्याचा निर्णय घेण्यात आल्याची माहिती एमएमआरसीकडून देण्यात आली आहे. त्यासाठी कंत्राटदाराची नियुक्ती करण्यात आली असून मेट्रो ३ मार्गिकेदरम्यान, मेट्रो स्थानकाबाहेर लावण्यात आलेल्या सर्व झाडांच्या जिओ टॅगिंगच्या कामाला सुरुवात झाली आहे.

हेही वाचा >>> वांद्रे-वर्सोवा सागरी सेतू : पाच वर्षात केवळ २३ टक्के काम पूर्ण, प्रकल्प पूर्णत्वासाठी मे २०२८ उजाडणार

आतापर्यंत एमएमआरसीकडून २०००हून अधिक झाडांचे जिओ टॅगिंग पूर्ण करण्यात आले आहे. त्यावर क्यू आर कोड लावण्यात आला असून उर्वरित झाडांवर क्यू आर कोड लावण्याचे काम सुरु आहे. झाडावरील क्यू आर कोड स्कॅन करून नागरिकांना झाडांची उंची, आकार, प्रजाती, नाव आणि इतर संबंधित माहिती उपलब्ध होणार आहे. त्यामुळे एमएमआरसीने किती आणि कोणती झाडे लावली आहेत याची माहिती उपलब्ध होईल आणि झाडांच्या पुनर्रोपण प्रक्रियेत पारदर्शकता येईल असे एमएमआरसीने स्पष्ट केले आहे. दरम्यान झाडांवर लावण्यात आलेल्या क्यू आर कोडला नागरिकांनी हात लावू नये, क्यू आर कोड फाडू नये असे आवाहन एमएमआरसीकडून करण्यात आले आहे.