जोगेश्वरीतील गोविंदा पथकाचा निर्धार
नारळी पौर्णिमेला सराव शिबिरात दहीहंडी फोडून जमा होणारी बिदागी सावित्री नदीवरील वाहून गेलेल्या पूल दुर्घटनेत मृत्युमुखी पडलेल्याच्या कुटुंबाला देण्याचा संकल्प उंच दहीहंडी फोडण्याचा विक्रम साधणाऱ्या जोगेश्वरीतील गोविंदा पथकाने सोडला आहे.
दहीहंडी उत्सव जवळ आल्यानंतर मुंबईत ठिकठिकाणी रात्र जागवून उंच थर रचण्याचा सराव करण्यात तरुण मंडळी व्यस्त असतात. मात्र दहीहंडीची उंची आणि थरात सहभागी होणाऱ्या मुलांच्या वयोमर्यादेवर येणारी बंधने याबाबत स्पष्टता नसल्याने गोविंदा पथकांचा सरावाबाबतचा उत्साह मावळला होता. मात्र नारळी पौर्णिमा जवळ येताच गोविंदांमधील उत्साह सळसळू लागला असून गोविंदा पथकांनी मोठय़ा उत्साहात चोर गोविंदा काढण्याची तयारी सुरू केली आहे. तर दुसरीकडे महाड दुर्घटनेतील मृत्युमुखी पडलेल्या प्रशांत माने यांच्या कुटुंबीयाला मदत करण्यासाठी गोविंदा सरसावले आहेत.
पोलादपूरजवळील सावित्री नदीवरील पूल वाहून गेला आणि त्यात जोगेश्वरीमधील प्रशांत माने यांचा मृत्यू झाला. प्रशांत माने यांच्या कुटुंबाला अर्थिक मदत करण्याच्या उद्देशाने यंग उमरखाडी क्रीडा मंडळ आणि यंग उमरखाडी गोविंदा पथकाने दहीहंडी बांधण्याचा निर्णय घेतला आहे. उंच दहीहंडी फोडण्याचा विक्रम करणाऱ्या जोगेश्वरीमधील जय जवान गोविंदा पथक यंदा प्रथमच नारळी पौर्णिमेनिमित्त ‘चोर गोविंदा’ काढणार आहे. उमरखाडीमधील दहीहंडी फोडून माने कुटुंबीयांना मदत करण्यासाठी मंडळ सरसावले आहे. याच दिवशी अन्य काही ठिकाणी दहीहंडी फोडून मिळणारी बिदागी माने कुटुंबाला देऊ, असे या मंडळाचे महेश सावंत यांनी सांगितले.
गोपाळकाल्याच्या दिवशी गोविंदा पथके दहीहंडी फोडून आनंद लुटत असतात इतकेच सर्वाना माहीत आहे. परंतु ही पथके उत्सवानंतर वर्षभर विविध सामाजिक उपक्रम राबवीत असतात. त्याचा फायदा परिसरातील रहिवाशांना होतो. दुर्घटना घडल्यानंतर या पथकांमधील तरुण दुर्घटनाग्रस्तांच्या मदतीला धाव घेतात. माने कुटुंबाला आर्थिक मदत करण्याचा निर्णय सामाजिक बांधिलकीतून आम्ही घेतला आहे.
– कमलेश भोईर, यंग उमरखाडी गोविंदा पथक
सध्या दहीहंडी उत्सव टीकेचे लक्ष्य बनला आहे. पण याच उत्सवाच्या माध्यमातून होणाऱ्या सामाजिक उपक्रमांकडे दुर्लक्ष केले जाते. दहीहंडी फोडून मिळणारे पैसे या उपक्रमांसाठी वापरले जातात. आजपर्यंत गोपाळकाल्यालाच आम्ही गोविंदा काढत होतो. पण माने कुटुंबाला मदत करण्यासाठी प्रथमच नारळी पौर्णिमेला सराव शिबिरात सहभागी होण्याचा निर्णय घेतला आहे.
– डेविड फर्नाडिस, जय जवान गोविंदा पथक, जोगेश्वरी
