विक्रमी पाऊस

२४ तासांत २१८ मिमी
बुधवारी सकाळी साडेआठ वाजता केलेल्या नोंदीनुसार गेल्या २४ तासांत उपनगरात २१५.६ मिमी तर शहरात २१८.६ मिमी पाऊस झाला. या मोसमातील हा सर्वात मोठा पाऊस आहे. २६ जुलै २००५ रोजी पडलेल्या ९४४ मिमी या ढगफुटीनंतर २०० मिमीहून अधिक पाऊस पडण्याची गेल्या दहा वर्षांतील ही चौथी वेळ आहे. यापूर्वी २००९, २००७ आणि २००६ मध्ये पावसाने एका दिवसात २०० मिमीचा टप्पा ओलांडला होता. गेले चार दिवस पावसाची संततधार सुरू असल्याने तापमानही खाली उतरले आहे. सांताक्रूझ येथे बुधवारी सकाळी २२. ६ अंश सेल्सिअस किमान तापमान नोंदले गेले. गेल्या दहा वर्षांतील जुलैमधील हे सर्वात कमी किमान तापमान आहे.

अतिवृष्टीचा इशारा मागे
पुढील तीन दिवस कोकणसह मुंबईत अतिवृष्टीचा इशारा मागे घेण्यात आला आहे. संध्याकाळी साडेपाच वाजेपर्यंत सांताक्रूझ येथे १६.१ मिमी तर कुलाबा येथे १२.७ मिमी पाऊस झाला. पश्चिम किनारपट्टीवर असलेला ढगांचा पट्टा आता गुजरातकडे सरकला असून तिथे अतिवृष्टीचा इशारा देण्यात आला आहे, अशी माहिती मुंबई हवामानशास्त्र विभागाचे संशोधक के. एस. होसाळीकर यांनी दिली.

उत्साहाला भरती
बुधवारची सकाळ उजाडली तीच काळोखाने भरलेली.. पावसाच्या काळ्या दाट ढगांनी सूर्याचा एकही किरण जमिनीवर पोहोचू न देण्याचा विडा उचललेला.. मंगळवारी पावसाने दाखवलेले तांडवनृत्य आणि अतिवृष्टीचा इशारा.. मुसळधार कोसळत असलेल्या धारा आणि जोडीला सुटलेले गार वारे.. या सगळ्या परिस्थितीत आज काय वाढून ठेवले आहे, असा विचार करीत अनेकांनी घरी बसण्यातच शहाणपण मानले. पण दोन तासांतच पावसाचा जोर ओसरला आणि मग अनेकांनी आयत्या मिळालेल्या सुट्टीचा फायदा घेत किनाऱ्यावर येणाऱ्या उंच लाटांच्या दर्शनासाठी मोर्चा वळविला. लाटांमुळे उसळणाऱ्या फवाऱ्यात चिंब भिजण्याचा आनंद गेट वे, मरीन ड्राईव्ह, शिवाजी पार्क, जुहू किनाऱ्यावर अनेकांनी लुटला अन् बुधवारी मुंबईत सर्वत्र पाऊसदिन साजरा झाला. अतिवृष्टीचा इशारा आणि त्यातच दुपारी समुद्रात सर्वात मोठय़ा लाटा उसळणार असल्याने खबरदारीचा उपाय म्हणून आवश्यकता असेल तरच घराबाहेर पडा, असे आवाहन पालिकेकडून केले जात होते. दुपारच्या वेळेला असलेल्या शाळा सोडून देण्यास सांगण्यात आले होते. परंतु दुपारनंतर पावसाचा जोर ओसरला. अनेक सखल भागात साचलेले पाणीही कमी होऊ लागले. सर्वात उंच लाट किनाऱ्यावर आदळून गेली. वरळी कोळीवाडा, खारदांडा, वेसावा गावांत घराघरात पाणी शिरले अन् नंतर सारे काही आलवेल झाले.

मोसमातील विक्रमी पाऊस
बुधवार हा दिवस यंदा सर्वाधिक पावसाचा दिवस ठरला, शिवाय गेल्या दहा वर्षांतील जुलै महिन्यातील सर्वात कमी किमान तापमानाची नोंदही बुधवारी सकाळी झाली.