मुंबई : खार लिकिंग रोड येथे भरधाव वेगाने मोटार चालवित तिघांना जखमी केल्याची घटना घडली. पोलिसांनी आरोपीला थांबवण्याचा प्रयत्न केला असता आरोपीने पोलिसांच्या अंगावरही गाडी घालण्याचा प्रयत्न केला. याप्रकरणी आरोपी हितेन देसाई (५३) याला अटक केली असून दारूच्या अंमलाखाली तो मोटरगाडी चालवत असल्याचा संशय आहे.
वांद्रे पूर्व येथे राहणाऱ्या धनश्री गणतांडेल (३६) या १६ जूनला लिंकिंग रोड येथे बहीण सरोज सिंहबरोबर कपडे खरेदीसाठी गेल्या होत्या. तेथे मोटरगाडी चालकाने तक्रारदार धनश्री यांच्या अंगावरून मोटरगाडी नेण्याचा प्रयत्न केला. त्यात त्यांच्या डाव्या हाताला दुखापत झाली. त्यापूर्वी मोटरगाडीने एका दुचाकीला धडक दिली होती.
पोलिसांनी गाडी थांबवण्याचा प्रयत्न केला असता आरोपीने मोटरगाडी भरधाव चालवून नागरिकांना धडक दिली. त्यावेळी गाडीच्या काचाही फुटल्या. तर दुसऱ्या एका पोलीस हवालदाराने मोटर अडवण्याचा प्रयत्न केला असता आरोपीने त्यांच्या अंगावरही गाडी घालण्याचा प्रयत्न केला. त्यामुळे घाबरून ते बाजूला सरकले. शेवटी पाली हिल येथे पोलिसांनी मोटरगाडी अडविली. आरोपी देसाई नामांकित कंपनीत उच्च पदावर कार्यरत आहे.
