सैफवर हल्ला करणाऱ्या आरोपीच्या घराला आता टाळे

आरोपी शहजाद सोबत राहिल्याच्या संशयावरून दोन व्यक्तींची गुन्हे शाखेने चौकशी केली. त्यानंतर त्यांना सोडून दिल्याचे सूत्रांनी सांगितले. पण तेव्हापासून जयहिंद मित्र मंडळातील खोली बंद आहे. शेजाऱ्यांना याबाबत विचारले असता गेल्या दोन दिवसांपासून त्या परिसरात मोठ्याप्रमाणात गुन्हे शाखेचे पोलीस येत आहे. शेजारच्या घरात कोण येते आम्हाला काही माहित नाही. पण इथे अंडी विकणारी दोन मुले राहतात. आता त्यांच्यासोबत कोण राहून गेले याची माहिती नाही. पण पोलिसांनी आम्हाला याबाबत विचारल्याचे शेजारी राहणाऱ्या महेश ठाकूर यांनी सांगितले. त्याच ठिकाणी ऑगस्ट महिन्यातही आरोपी राहिल्याचा संशय आहे.

हेही वाचा – “हो, मीच केलं…”, आरोपीची कबुली, सैफवरील हल्ल्याचे प्रकरण

आरोपी शहजाद हा बांगलादेशी घुसखोर असल्याचे निष्पन्न झाले आहे. बांगला देशातून मुंबईत आल्यावर तो काही काळ मुंबईतील वरळी कोळीवाड्या शेजारी असलेल्या जनता कॉलनी येथे वास्तव्याला होता, अशी माहिती कळते आहे. त्याची पडताळणी करण्यात येत आहे. याप्रकरणी आरोपीसह राहणाऱ्यांना दोघांची शनिवारी गुन्हे शाखेने चौकशी केल्याचे सूत्रांनी सांगितले. आरोपी मुंबईत हाऊस किंपींग एजन्सीमध्ये कामाला होता. त्याच्या शोधासाठी पोलीस पथक जनता कॉलनी परिसरातही आले होते. आरोपीकडे कोणतीही अधिकृत कागदपत्रे नसल्यामुळे त्याच्याविरोधात पारपत्र कायदा व परकीय नागरिक कायद्या अंतर्गत कलमांची वाढ करण्यात येणार आहे. आरोपी पूर्वी ठाण्यातील हॉटेलमध्ये कामाला होता. आरोपीला ठाण्यातील कासारवडवली पोलीस ठाण्याच्या हद्दीतून अटक करण्यात आली आहे. तेथे आरोपी हिरानंदानी इस्टेट येथील झाडीमध्ये लपून पसला होता. अखेर त्याला ताब्यात घेऊन वांद्रे येथे आणण्यात आले आहे. त्यानंतर त्याला सुरुवातीला चेंबूर पोलीस ठाणे व त्यानंतर खार पोलीस ठाण्यात ठेवण्यात आले होते.

हेही वाचा – Saif Ali Khan Latest News : सैफवर हल्ला करणारा आरोपी मुंबईत नेमका कुठे वास्तव्याला?

आरोपीला सैफ हल्ल्याप्रकरणी वांद्रे पोलिसांनी अटक केली असून त्याला रविवारी न्यायालालयापुढे हजर करण्यात येणार आहे. त्याच्या अटकेसाठी गुन्हे शाखा, तसेच मुंबई पोलिसांच्या १०० जणांची विविध पथके तयार केली होती. अखेर त्याला अटक करण्यात आली आहे.