महापे उड्डाणपुलाजवळ सकाळ-संध्याकाळ वाहतूक कोंडी

एमआयडीसी भागात सुरू असलेली रस्त्याची कामे, महापे उड्डाणपुलाखालील सिग्नलच्या वेळेत केलेली फेररचना आणि पादचाऱ्यांसाठी द्यावा लागणारा वेळ यामुळे महापे उड्डाणपुलाच्या तिन्ही बाजूंनी सकाळ-संध्याकाळ वाहतूक कोंडी जाळे पसरत असल्याचे दिसून येत आहे. त्यात ठाणे-बेलापूर मार्गावरील वाहतुकीला प्रथम प्राधान्य देण्यासाठी एमआयडीसीतून जाणाऱ्या वाहतुकीला दोन सेकंद जास्त थांबण्याची शिक्षा देण्यात आली आहे.
ठाणे-बेलापूर मार्गावर नवी मुंबईतून जाणाऱ्या वाहनांची संख्या आता एक लाखाच्या वर गेली आहे. त्यात या मार्गावर पदोपदी असणाऱ्या बायपासमुळे ही वाहतूक सुरळीत होत नाही. प्रत्येक गावाच्या हद्दीवर या रस्त्याला बायपास आहे. या रस्त्याची पुनर्रचना करताना सव्‍‌र्हिस रोडचा पर्याय ठेवण्यात आला होता, पण दोनशे कोटी रुपये खर्च केल्यानंतरही सव्‍‌र्हिस रोडचा थांगपत्ता नाही. त्यामुळे या मार्गावर गर्दीच्या वेळी विशेषत: सकाळ-संध्याकाळ मोठय़ा वाहतूक कोंडीचा सामना वाहनचालकांना करावा लागत आहे. महापे हा या मार्गावरील सर्वात मोठा जंक्शन असल्याने या सिग्नलवरील वाहतूक कोंडीची रांग एक किलोमीटर लांब अंतरापर्यंत काही क्षणांत पोहचत असल्याचे दिसून येते. बेलापूरवरून येणाऱ्या वाहनांच्या कोपरखैरणे उड्डाणपुलापर्यंत तर एमआयडीसीतील वाहनांच्या महापे सर्कलपर्यंत आणि ठाण्याहून येणाऱ्या वाहनांच्या घणसोलीपर्यंत रांगा लागत आहेत. दोन दिवसांपूर्वी या उड्डाणपुलाखालील सिग्नलच्या वेळेत फेररचना करण्यात आली आहे. ठाणे-बेलापूर मार्गावरील वाहतुकीला प्रथम प्राधान्य देण्यासाठी त्याची वेळ २० सेकंदांवरून २२ सेकंद करण्यात आली आहे तर एमआयडीसीतील वाहनाच्या सिग्नल वेळेत कपात करून ती दोन सेकंदांनी कमी करण्यात आली आहे. त्यामुळे एमआयडीसीतील वाहनांची रांग काही मिनिटांत महापे सर्कलपर्यंत पोहोचत असल्याचे चित्र आहे. एमआयडीसी भागात शिळफाटा, फायझर आणि रबाळे एमआयडीसीत रस्त्याची कामे सुरू करण्यात आली आहेत. त्यात महापे येथे उड्डाणपुलाचे काम जोरात सुरू आहे, पण काम करणारे कंत्राटदार वाहतूक पोलिसांबरोबर समन्वय साधत नसल्याने वाहतूक कोंडीत अधिक भर पडत असल्याचे पोलिसांचे मत आहे. एमआयडीसीअंतर्गत भागातून जाणारी वाहतूक आता ठाणे-बेलापूर मार्गावर वळत आहेत पण या मार्गावरही वाहतूक कोंडी बघून ही वाहने एमआयडीसीतील पर्यायी रस्त्याचा वापर करीत आहेत. तळवली, रबाळे, घणसोली येथील ग्रामस्थांसाठी उभारण्यात आलेल्या सिग्नलमुळेही ठाणे-बेलापूर मार्गावरील वाहतूक कोंडी होण्यास कारणीभूत असल्याचे पोलीस साहाय्यक पोलीस निरीक्षक राजेंद्र कोते यांनी सांगितले.