निरोप घेतो देवा आता..

पोलीस सज्ज
गणपती विसर्जनासाठी मुंबई पोलीस सज्ज झाले आहेत. मुंबईतल्या सर्व चौपाटीवर आणि विसर्जन स्थळावर पोलिसांनी विशेष व्यवस्था केली आहे. गिरगाव चौपाटीवर दोन अतिरिक्त पोलीस आयुक्त, ४ पोलीस उपायुक्त. १० सहाय्यक पोलीस आयुक्त, तसेच पाचशे पोलीस अधिकारी तैनात करण्यात आले आहेत. सर्व विसर्जन स्थळांवर सीसीटीव्ही कॅमेरे लावण्यात आले असून छेडछाड विरोधी पथक तयार ठेवण्यात आले आहेत. पोलिसांच्या मदतील राज्य राखीव पोलीस बल, शीघ्र कृती दलाच्या तुकडय़ा आहेत. यंदा टेहळणी मनोऱ्यांची संख्या वाढविण्यात आली आहे. साध्या वेषातील पोलीसही गर्दीवर लक्ष ठेवून असतील.
पाखटाची भीती कायम
दीड आणि गौरी गणपतींच्या विसर्जनाच्या वेळी गिरगाव चौपाटीवर समुद्रात उतरलेल्या भाविकांना पाखटाने (स्टींग रे) चावा घेतल्यामुळे रुग्णालयात धाव घ्यावी लागली होती. पाखटांचा मुक्काम अद्याप गिरगाव चौपाटीजवळच आहे. त्यामुळे गणेश विसर्जनासाठी गिरगाव चौपाटीवर पाण्यात उतरताना सावधगिरी बाळगावी. पालिकेने उपलब्ध केलेल्या तराफ्यांवरून गणेशमूर्तीचे विसर्जन करावे, असे आवाहन अ‍ॅड्. नरेश दहिबावकर यांनी केले आहे.
मूर्तीच्या संख्येत वाढ
आतापर्यंत दीड दिवस, पाच दिवस व सात दिवसांच्या एक लाख ६५ हजार ४१७ गणेशमूर्तीचे विसर्जन झाले आहे. गेल्या वर्षी एक लाख ९९ हजार मूर्तीचे विसर्जन करण्यात आले होते व त्यातील ४२,६६० गणेशमूर्तीचे अनंतचतुर्दशीला विसर्जन करण्यात आले. त्यापैकी ११,८५३ सार्वजनिक मूर्ती होत्या. या वेळी मूर्तीच्या संख्येत थोडी वाढ अपेक्षित आहे.
पावसाच्या सरींची शक्यता
गेल्या आठवडय़ापासून दररोज संध्याकाळी पावसाच्या सरी पडत आहेत. अनंत चतुर्दशीदिवशीही शहरात पावसाच्या हलक्या व मध्यम स्वरूपाच्या सरींची शक्यता हवामानशास्त्र विभागाने व्यक्त केली आहे. काही भागांत मुसळधार सरींची शक्यताही व्यक्त करण्यात आली आहे.
भरती व ओहोटी
बुधवार, १८ सप्टेंबर रोजी सकाळी ११.१५ वाजता व रात्री ११.४५ वाजता तसेच १९ सप्टेंबर रोजी ११.५५ वाजता साडेचार मीटर उंचीची भरती आहे. १८ सप्टेंबर रोजी संध्याकाळी साडेपाच वाजता व १९ सप्टेंबर रोजी पहाटे साडेपाच वाजता ओहोटी आहे.