मुंबईकरांसाठी महत्त्वाची बातमी, १२ डब्यांच्या ‘या’ ४९ लोकल ट्रेन १५ डब्यांसह धावणार; गोंधळ टाळण्यासाठी आत्ताच जाणून घ्या!

पश्चिम रेल्वेने काय निर्णय घेतला?

१५ ऑगस्टपासून १२ डब्यांच्या लोकल १५ डब्यांच्या करण्यात येणार आहेत. पश्चिम रेल्वेने आज सोमवारी जाहीर केलेल्या माहतीनुसार, ४९ लोकल १५ डब्यांच्या करण्यात येणार आहेत. मिड डे ने यासंदर्भातील वृत्त दिले आहे.

हेही वाचा >> “मुंबईकरांना पुन्हा मुंबईत आणण्यासाठी…”, एकनाथ शिंदेंनी सांगितला सरकारचा प्लान; म्हणाले, “म्हाडा…”

प्रवासी वहन क्षमता २५ टक्क्यांनी वाढणार

१२ डब्यांच्या लोकल १५ डब्यांच्या केल्यानंतर २५ टक्क्यांनी प्रवाशांची क्षमता वाढणार आहे, अशी माहिती पश्चिम रेल्वेकडून देण्यात आली आहे.

पश्चिम रेल्वेने नेमकं काय म्हटलंय?

“मुंबई उपनगरी विभागातील लोकलमधून अधिकाधिक प्रवाशांना प्रवास करता यावा याकरता उत्तम रेल्वे सेवा प्रदान करण्याच्या उपक्रमाअंतर्गत पश्चिम रेल्वेने १२ डब्यांच्या ४९ लोकल ट्रेनचे १५ डब्यात रूपांतर करण्याचा निर्णय घेतला आहे. हा बदल १५ ऑगस्ट २०२३ पासून प्रभावी होईल”, असं पश्चिम रेल्वेच्या प्रसिद्धी पत्रकात म्हटलं आहे. “हा बदल म्हणजे पश्चिम मार्गावरील रेल्वे प्रवाशांसाठी मोठे वरदान ठरणार आहे”, असंही पत्रकांत म्हटलं आहे.

१५ डब्यांच्या लोकलची संख्या १९९ वर

“प्रत्येक ट्रेनची वहन क्षमता २५ टक्क्यांनी वाढणार आहे. यासह, पश्चिम मार्गाच्या मुंबई उपनगरी विभागात एकूण १५ डब्यांची रेल्वेची संख्या १५० वरून १९९ पर्यंत वाढेल. वाढीव डब्यांच्या २५ लोकल डाऊन मार्गावर तर २४ लोकल अप मार्गावरून धावणार आहेत.