मुंबई : गणेशोत्सवाला केवळ दोन महिने शिल्लक असून बृहन्मुंबई सार्वजनिक गणेशोत्सव समितीने उत्सवाची तयारी सुरू केली आहे. समितीने सर्व सार्वजनिक गणेशोत्सव मंडळांची एक बैठक २२ जून रोजी आयोजित केली आहे. यावर्षी ७ सप्टेंबर रोजी गणेशोत्सव सुरू होत आहे. केवळ दोन महिने शिल्लक असून यंदाचा गणेशोत्सव पर्यावरणपूरक करण्याच्यादृष्टीने पालिका प्रशासनानेही तयारी केली आहे. त्यामुळे यंदाचा गणेशोत्सव वेगळा असण्याची शक्यता आहे. गणेशोत्सवाच्या निमित्ताने दरवर्षी मंडळांना ज्या समस्यांना सामोरे जावे लागते त्याबाबत चर्चा करण्यासाठी ही बैठक आयोजित करण्यात आली आहे. हेही वाचा : “नाटयगृहांवरील कर, देखभालीची जबाबदारी सरकारची”, शरद पवार यांचे मत दादर पूर्व येथील राजा शिवछत्रपती शाळेच्या नाबर गुरुजी सभागृहात २२ जून रोजी सायंकाळी ५ वाजता समितीचे अध्यक्ष ॲड. नरेश दहिबावकर यांच्या अध्यक्षतेखाली ही बैठक होणार आहे. मंडळांना पालिका, पोलीस, वाहतूक विभाग, पर्यावरण विभाग, अग्निशमन दल या सर्व विभागांशी संबधित भेडसावणाऱ्या अडचणींबाबत या बैठकीत चर्चा करण्यात येणार असल्याची माहिती दहिबावकर यांनी दिली. येत्या गणेशोत्सवाच्या पार्श्वभूमीवर संबंधित विभागांकडे कोणत्या समस्यांबाबत पाठपुरावा करायचा ते ठरवण्यासाठी ही बैठक आयोजित करण्यात आली आहे. मंडळाच्या प्रतिनिधींनी लेखी स्वरुपात आपल्या समस्या, मागण्या सादर कराव्यात, असे आवाहन समितीने केले आहे.