मुंबई: वांद्रे येथील बॉलीवूड थीम पार्कच्या कामाला वेग

एमएमआरडीए उभारत असलेली २३.६४३ किमी लांबीची ‘मेट्रो २ ब’ मार्गिका एस. व्ही. रोडवरून जात आहे. एस. व्ही. रोड परिसरातील पाली हिल, कार्टर रोडसारख्या ठिकाणी चित्रपटसृष्टीतील कलाकार, दिग्दर्शक, संगीतकार, गायक आदी मंडळी वास्तव्याला आहेत. या परिसरात पर्यटकांची नेहमीच गर्दी असते. या पार्श्वभूमीवर भारतीय चित्रपटसृष्टीचा इतिहास मेट्रो मार्गिकांच्या खांबावर, मेट्रो मार्गिकांखालील रस्त्यावर रेखाटून पर्यटकांना, नागरिकांना आकर्षित करण्याची संकल्पना स्थानिक आमदार ॲड आशिष शेलार यांनी एमएमआरडीएसमोर मांडली होती. त्यांच्या संकल्पनेनुसार एमएमआरडीएने २०० कोटी रुपये खर्च करून मेट्रो मार्गिकेखाली बाॅलीवूड थीम पार्क उभारण्याचा निर्णय घेतला. त्यानुसार ‘मेट्रो २ ब’ मार्गिकेतील ईएसआयसी नगर – वांद्रे पश्चिमदरम्यान एकूण सात मेट्रो स्थानकांखालील ३५५ खांबांमधील मोकळ्या जागेवर हे थीम पार्क उभारण्यात येत आहे.

हेही वाचा : डॉ. अजित रानडेंच्या हकालपट्टीचा निर्णय रद्द, गोखले इन्स्टिट्युटची न्यायालयात माहिती

सप्टेंबरमध्ये शेलार यांच्या हस्ते या प्रकल्पाचे भूमिपूजन करण्यात आले. त्यानंतर या कामाला सुरुवात करण्यात आली असून आता कामाने वेग घेतला आहे. शिल्प, एलईडी दिवे, डिजिटल आणि अद्ययावत तंत्रज्ञानाचा वापर या थीम पार्कमध्ये केला जाणार आहे. १९१३ – २०२३ दरम्यानच्या चित्रपटसृष्टीच्या कालखंडातील महत्त्वाच्या घटना, सिनेमा, जुने-नवे कलाकार आणि चित्रपटातील प्रसंग अशी या थीम पार्कची रचना असणार आहे. या थीम पार्कच्या कामाने आता वेग घेतला असून डिसेंबरपर्यंत काम पूर्ण करून हे थीम पार्क नागरिकांसाठी खुले करण्याचे नियोजन आहे. हे थीम पार्क खुले झाल्यानंतर रविवारी सकाळी रस्त्याचा काही भाग वाहनांसाठी, वाहतुकीसाठी बंद केला जाणार आहे. महत्त्वाचे म्हणजे येत्या काळात या ठिकाणी चित्रपटाचे प्रशोमन करता येईल, तर चित्रपटाशी संबंधित उपक्रमही राबविले जाणार आहेत.