मुंबई : मुंबईकरांना पाणीपुरवठा करणाऱ्या मुंबईमधील दोन तलावांपैकी एक तुळशी तलाव २० जुलै रोजी सकाळी ८.३० च्या सुमारास पूर्ण भरून वाहू लागला. गेल्या वर्षी याच दिवशी मध्यरात्री १.२८ च्या सुमारास हा तलाव भरून वाहू लागला होता. ८०४.६ कोटी लीटर अर्थात ८०४६ दशलक्ष लीटर उपयुक्‍त जलधारण क्षमता असणारा हा तलाव २०२२ व २०२१ मध्ये १६ जुलै रोजी, तर २०२० मध्ये २७ जुलै रोजी तुळशी तलाव ओसंडून वाहू लागला होता.
मुंबईकरांना पाणीपुरवठा करणाऱ्या सात धरणांपैकी तुळशी हे सर्वात लहान तलाव असून यातून दररोज सरासरी १८ दशलक्ष लीटर (१.८ कोटी लीटर) एवढ्या पाण्‍याचा पुरवठा केला जातो. गेल्या काही दिवसात या तलावाच्या पाणलोट क्षेत्रात झालेल्या पावसामुळे हा तलाव भरून वाहू लागला आहे, अशी माहिती महानगरपालिकेच्या जल अभियंता खात्याद्वारे देण्यात आली आहे.
हेही वाचा : Uddhav Thackeray : ‘मुंबईला अदाणी सिटी करण्याचा मोदी-शाहांचा डाव’, उद्धव ठाकरेंची घणाघाती टीका
मुंबई महानगरपालिका मुख्यालयापासून साधारणपणे ३५ किलोमीटर अंतरावर असलेल्या या कृत्रिम तलावाचे बांधकाम १८७९ मध्ये पूर्ण झाले. या तलावाच्या बांधकामासाठी सुमारे ४० लाख रुपये खर्च आला होता. या तलावाचे पाणलोट क्षेत्र सुमारे ६.७६ किलोमीटर असून तलाव पूर्ण भरलेला असताना तलावाचा उपयुक्‍त पाणीसाठा हा ८०४.६ कोटी लीटर (८०४६ दशलक्ष लीटर) एवढा असतो. तुळशी तलाव पूर्ण भरून ओसंडून वाहणारे पाणी पुढे विहार तलावाला जाऊन मिळते.
