मुंबई: धावत्या लोकलमध्ये शिरून एका चोराने महिला प्रवाशाच्या गळ्यातील मंगळसूत्र खेचून पळ काढल्याची घटना १५ दिवसांपूर्वी दादर रेल्वे स्थानकात घडली होती. याप्रकरणी रेल्वे गुन्हे शाखेने तपास करून दोघांना अटक केली असून याप्रकरणी पोलीस अधिक तपास करीत आहेत. तक्रारदार मधुरा गुरव २२ मे रोजी रेल्वेच्या प्रथम श्रेणीच्या डब्यातून दादर - विरारदरम्यान प्रवास करीत होत्या. दादर रेल्वे स्थानकातून गाडी सुरू होताच अचानक एक चोराने डब्यात प्रवेश केला. क्षणातच त्याने मधुरा यांच्या गळ्यातील सोन्याचे मंगळसूत्र खेचून पळ काढला. महिलेने आरडाओरडा केला. मात्र तोपर्यंत चोरने पोबारा केला होता. हेही वाचा : हिवताप, डेंग्यूमुक्त मुंबईसाठी कृती आराखडा तयार करणार; अतिरिक्त महानगरपालिका आयुक्त डॉ. सुधाकर शिंदे यांचे निर्देश घटनेनंतर महिलेने मुंबई सेंट्रल लोहमार्ग पोलीस ठाण्यात याबाबत तक्रार दाखल केली होती. त्यानुसार पोलीस आरोपीचा शोध घेत होते. याच दरम्यान लोहमार्ग गुन्हे शाखा युनिट ६ ने समांतर तपास सुरू केला होता. रेल्वे स्थानकावरील सीसी टीव्ही कॅमेऱ्यातील चित्रणाच्या माध्यमातून पोलिसांनी चोराची ओळख पटवून मतीउर शेख (३२) याला वाडीबंदर परिसरातून ताब्यात घेतले. यावेळी त्याने गुन्ह्याची कबुली देत चोरलेले मंगळसूत्र एका साथीदाराकडे ठेवल्याची माहिती पोलिसांना दिली. पोलिसांनी त्याचा साथीदार कीर्तिराम नायक (५२) याला अटक केली असून त्याच्याकडून चोरलेले मंगळसूत्र हस्तगत करण्यात आले.
