मुंबई : ठाणे जिल्ह्यात जोरदार पाऊस पडल्याने, अनेक भागात पूरसदृश स्थिती निर्माण झाली आहे. त्यामुळे जनजीवन विस्कळीत झाले आहे. मध्य रेल्वेच्या आटगाव-तानशेत दरम्यान भूस्खलन झाल्याने, रेल्वे रुळावर चिखल-मातीचा ढिगारा साचला आहे. तसेच, खडावली-टिटवाळा दरम्यान तांत्रिक बिघाड झाल्याने आणि वाशिंद-खडावली दरम्यान रेल्वे रूळावर पाणी भरल्याने कल्याण ते कसारा दरम्यानची रेल्वे सेवा ठप्प झाली आहे. परिणामी, लोकल सेवा बंद झाली असून रेल्वेगाड्यांचे मार्ग बदलले आहेत.
जालना ते सीएसएमटी वंदे भारत एक्स्प्रेस इगतपुरीपर्यंत चालवण्यात येणार आहे. तसेच इगतपुरीवरून जालन्याच्या दिशेने मार्गस्थ होणार आहे. परिणामी प्रवाशांचे प्रचंड हाल झाले आहेत. शनिवारी रात्रीपासून मुंबईसह ठाणे जिल्ह्यात पावसाने जोर धरला आहे. रविवारी पहाटेही पावसाचा जोर कायम राहिल्याने ठाणे जिल्ह्यातील नद्या दुथडी भरून वाहत असून सखल भागात पाणी भरले आहे. वाशिंद-खडावली दरम्यान रेल्वे रूळावर पाणी भरले आहे. कल्याण-कसारा दरम्यान रेल्वेगाड्यांचा मार्ग बंद झाला आहे. त्यामुळे मुंबईच्या दिशेने येणाऱ्या अनेक रेल्वेगाड्या मनमाड, नाशिक, इगतपुरीपर्यंत चालवण्यात येणार आहेत. उत्तर भारतात जाणाऱ्या काही रेल्वेगाड्या दिवा-वसई रोड-जळगाव या मार्गाने चालवण्यात येणार आहेत. गाडी क्रमांक २०७०५ जालना-सीएसएमटी वंदे भारत एक्स्प्रेस इगतपुरीपर्यंत धावेल. तर, गाडी क्रमांक २०७०६ सीएसएमटी-जालना वंदे भारत एक्स्प्रेस इगतपुरी येथून चालवण्यात येईल. त्यामुळे रविवारचा वंदे भारतचा प्रवास करणाऱ्या प्रवाशांचे प्रचंड हाल होणार आहेत.
हेही वाचा : मुंबई: बनावट सोने बँकेत गहाण ठेऊन १.३८ कोटींची फसवणूक, आरोपीला अटक
मुंबईवरून जाणाऱ्या वंदे भारत एक्स्प्रेसला प्रवाशांचा चांगला प्रतिसाद असतो. मात्र, आता इगतपुरी येथून वंदे भारत सुटणार असल्याने मुंबईतील प्रवाशांना इगतपुरी येथे पोहचणे गैरसोयीचे होत आहे. यासह मनमाड- सीएसएमटी पंचवटी एक्स्प्रेस इगतपुरीपर्यंत चालवण्यात येणार आहे. सीएसएमटी-जालना नाशिकवरून चालवण्यात येणार आहे. नागपूर-सीएसएमटी सेवाग्राम एक्स्प्रेस देवळालीपर्यंत आणि सीएसएमटी-नागपूर सेवाग्राम एक्स्प्रेस नाशिकवरून चालवण्यात येईल. तर, सीएसएमटी-लखनौ पुष्पक एक्स्प्रेस, एलटीटी-भागलपुर एक्स्प्रेस, एलटीटी-आगरताळा एक्स्प्रेस दिवा-वसई रोड-जळगाव मार्गे धावणार आहे.
