मुंबई : मित्रांना भेटून घरी परतणाऱ्या तरुणाचे अपहरण करून त्याच्याकडील दहा हजार रुपयांची रोख रक्कम लुटल्याची घटना चेंबूरमध्ये घडली. याबाबत आरसीएफ पोलिसांनी गुन्हा दाखल करून एका आरोपीला अटक केली असून त्याच्या इतर साथीदारांचा पोलीस शोध घेत आहे.
चेंबूरच्या वाशीनाका परिसरात वास्तव्यास असलेला सरफराज शेख (२२) बुधवारी रात्री परिसरातील मित्रांना भेटून दुचाकीवरून घरी जात होता. याच वेळी वाशीनाका परिसरातील नागाबाबा नगर येथे अचानक त्याच्या दुचाकीसमोर चारजण आले. या चौघांनी त्याचे अपहरण केले आणि त्याला गोवंडी परिसरात नेले.
हेही वाचा : मुंबईतील घर, कार्यालयांमध्ये चोरी करणारी गुजरातमधील महिलांची टोळी गजाआड
आरोपींनी गोवंडी येथे सरफराजला मारहाण केली आणि त्याच्याकडील रोख १० हजार रुपये रक्कम घेऊन पोबारा केला. याप्रकरणी सरफराजने आरसीएफ पोलीस ठाण्यात तक्रार दाखल केली. त्यानंतर पोलिसांनी गुन्हा दाखल अझीदूर सदम (३३) याला अटक केली. तसेच पोलीस सदमच्या अन्य तीन साथीदारांचा शोध घेत आहेत.
