मुंबईत महिला व अल्पवयीन मुलींविरोधात घडलेल्या गुन्ह्यांमध्ये वाढ, २०२४ मध्ये बलात्कार, विनयभंग व पोक्सो गुन्ह्यांत वाढ

मुंबई पोलिसांच्याआकडेवारीनुसार, २०२४ मध्ये मुंबईत १०५१ बलात्काराच्या घटना घडल्या तर २०२३ मध्ये ९७३ गुन्ह्यांची नोंद झाली होती. गंभीर बाब म्हणजे परिचीत व्यक्तीकडून झालेल्या बलात्काराच्या घटनेत गुन्ह्याची उकल होण्याचे प्रमाण ९६ टक्क्यांवरून ९४ टक्क्यांवर घटले आहे. याशिवाय विनयभंगाच्या गुन्ह्यांमध्येही गेल्यावर्षी वाढ झाली आहे. शहरात २०२३ मध्ये २०५५ विनयभंगाचे गुन्हे दाखल झाले होते. त्यात २०२४ मध्ये वाढ होऊन २३९७ गुन्ह्यांची नोंद झाली आहे. दरम्यान २०२३ व २०२४ मध्ये विनयभंगाच्या गुन्ह्यांत आरोपी अटक होण्याचे प्रमाण ९५ टक्के आहे.शहरातील महिला व अल्पवयीन मुलींच्या अपहरणाच्या घटनांमध्येही वाढ झाली असून मुंबई २०२३ मध्ये महिला व अल्पवयीन मुलींच्या अपहरणाचे ११६७ गुन्हे दाखल झाले होते. २०२४ मध्ये याच काळात १२३१ गुन्ह्यांची नोंद झाली आहे.अल्पवयीन मुलांवरील अत्याचारात वाढ

गंभीर बाब म्हणजे अल्पवयीन मुले व मुली यांच्याविरोधात घडलेल्या लैंगिक अत्याचाराच्या घटनांमध्येही वाढ झाली आहे. मुंबईत २०२४ मध्ये बालकांचे लैंगिक अत्याचारापासून संरक्षण (पोक्सो) कायद्या अंतर्गत १३४१ गुन्ह्यांची नोंद झाली होती. २०२३ पोक्सो कायद्या अंतर्गत ११०८ गुन्ह्यांची नोंद झाली होती. २०२४ मध्ये मुंबईत पोक्सो कायद्या अंतर्गत दाखल गुन्ह्यांमध्ये ६०९ बलात्कार, ६६७ विनयभंग व ३५ छेडछाड-अश्लील शेरेबाजी केल्याच्या घटनांचा समावेश आहे. २०२३ मध्ये अल्पवयीन मुलींवरील गुन्ह्यांतील ९९ टक्के गुन्ह्यांची उकल करण्यात पोलिसांना यश आले होते. २०२४ मध्ये या प्रमाणात घट झाली असून २०२४ मध्ये हे प्रमाण ९६ टक्के होते. याशिवाय विनयभंग व छेडछाड-अश्लील शेरेबाजी या गुन्ह्यांच्या उकल होण्याच्या प्रमाणही अनुक्रमे १०० टक्क्यांवरून ९७ टक्के व ९६ टक्क्यांवरून ९१ टक्क्यांपर्यंत घटले आहे.

दिवसाला १२ गुन्हे

बदलापूर लैंगिक अत्याचाराच्या घटनेमुळे राज्यभर अल्पवयीन मुलींच्या सुरक्षेचा प्रश्न ऐरणीवर आला होता. त्यावेळी मुंबईत लैंगिक अत्याचाराच्या, विशेष करून अल्पवयीन मुलांवरील अत्याचाराच्या घटना अधिक संवेदनशीलतेने हाताळून तात्काळ गुन्हा दाखल करण्याचे आदेश सर्व पोलिसांना वरिष्ठ अधिकाऱ्यांनी दिले आहेत.त्यामुळे त्या काळात दिवसाला १० ते १२ गुन्हे प्रतिदिवस दाखल करण्यात येत होते.

चोरी आणि दंगलीच्या घटनांत वाढइतर गंभीर गुन्हे नियंत्रणात मुंबईत चोरी आणि दंगलीच्या घटनांमध्येही वाढ झाली आहे. २०२३ मध्ये ६६८९ चोरीच्या आणि २९२ दंगलीच्या घटना घडल्या होत्या, तर २०२४ मध्ये त्यात वाढ होऊन ८२६२ चोरीचे आणि ३२३ दंगलीचे गुन्हे दाखल झाले. २०२३ मध्ये २९२ हत्येच्या प्रयत्नाचे गुन्हे दाखल झाले होते. त्यात २०२४ मध्ये वाढ होऊन ३०३ गुन्ह्यांची नोंद झाली. याशिवाय इतर गंभीर गुन्ह्यांच्या घटनामध्ये घट झाली आहे.मात्र, मुंबई पोलिसांनी हत्या, दरोडा, जबरी चोरी, सोनसाखळी चोरी आणि वाहन चोरी यांसारख्या गंभीर गुन्ह्यांवर घट झाली आहे. गेल्यावर्षी मुंबईत १०७ हत्या,१६ दरोडे, ४७४ जबरी चोरी, ११६ सोनसाखळी चोरी आणि २५८९ वाहन चोरीच्या गुन्ह्यांची नोंद झाली होती.