ठराविक जातींची महामंडळे आता उपकंपन्या

यापूर्वी महात्मा फुले, अण्णासाहेब पाटील, श्यामराव पेजे, अण्णा भाऊ साठे, वसंतराव नाईक यांच्या नावाने विशिष्ट समाजघटकांच्या कल्याणासाठी विविध महामंडळांची रचना सरकारकडून करण्यात आली होती. त्यात भर पाडत अनेक छोट्या जात समुहांसाठी महामंडळांची स्थापना करण्यात आली. त्यातील बहुसंख्य जाती ओबीसी वर्गातील होत्या. या महामंडळांची घोषणा करताना त्याअंतर्गत विशिष्ट समाजघटकांसाठी अनेक कल्याणकारी योजनाही जाहीर करण्यात आल्या.

विविध समाजांसाठी यापूर्वीच महामंडळे होती. ही संख्या आता वाढवण्यात येत आहे. सरकारच्या माध्यमातून् विविध ज्ञाती, समाजांचा विकास व्हावा, शासनसुविधांचा त्यांना लाभ मिळावा, हाही महामंडळे स्थापन करण्यामागील मुख्य उद्देश आहे. भाजप म्हणून नव्हे, तर सरकारच्या माध्यमातून महामंडळाचा कारभार चालेल. – रवींद्र चव्हाण, प्रदेश कार्याध्यक्ष, भाजप

कोणत्या समाजांचा समावेश?

●सुतार, बारी, आगरी, सोनार, वाणी, तेली, विणकर, गवळी, गुजर, लेवा पाटीदार, लोहार, शिंपी, नागपंथीय, लोणारी अशा वेगवेगळ्या समाजांसाठी तयार करण्यात आलेल्या आर्थिक विकास महामंडळांना मूर्त स्वरूप देण्यात आले आहे.

●इतर मागासवर्गीय वित्त आणि विकास महामंडळ तसेच वसंतराव नाईक विमुक्त व भटक्या जमाती आर्थिक विकास महामंडळाच्या अंतर्गत या उपकंपन्यांची स्थापना करण्यात आली आहे.

●या संदर्भात काढलेल्या वेगवेगळ्या शासन निर्णयांमध्ये महामंडळांची कार्यपद्धती, प्रशासकीय रचना तसेच संचालक मंडळाची रचनाही निश्चित करण्यात आली आहे.

●प्रत्येक उपकंपनीच्या संचालक मंडळावर तीन अशासकीय सदस्य नेमण्यात येणार असून त्यावर सत्ताधारी गोटातील नेते- पदाधिकाऱ्यांची वर्णी लागण्याची शक्यता आहे.