मुंबई : विधानसभा निवडणुकीत युती फिसकटल्याने मनसेने स्वबळावर निवडणूक लढवली. परंतु तत्कालीन मुख्यमंत्री एकनाथ शिंदे यांच्यामुळेच युती फिसकटली आणि त्याचा फटका अमित ठाकरे, संदीप देशपांडे यांना बसल्याची चर्चा आहे. त्यामुळे आता मुंबई महापालिका निवडणुकीत महायुतीत सामील होऊनच निवडणूक लढवावी, अशी मागणी मनसे नेत्यांकडून मंगळवारी पार पडलेल्या बैठकीत करण्यात आली.
आगामी मुंबई महापालिका निवडणुकीच्या अनुषंगाने महाराष्ट्र नवनिर्माण सेनेच्या प्रमुख पदाधिकाऱ्यांची बैठक मंगळवारी मुंबईत आयोजित करण्यात आली होती. मनसे अध्यक्ष राज ठाकरे यांच्या उपस्थितीत ही बैठक पार पडली. या बैठकीत राज यांनी पदाधिकाऱ्यांना विधानसभा निवडणुकीतील पराभव विसरून, नव्या दमाने कामाला लागण्याचा सल्ला दिला. विधानसभेत झाले ते विसरा आणि महापालिकेच्या तयारीला लागा, असा आदेश पदाधिकाऱ्यांना दिला. मनसे नेते आणि पदाधिकाऱ्यांची जवळपास दीड तास बैठक पार पडली. या वेळी एकनाथ शिंदे यांच्या नकारघंटेमुळे मनसे महायुतीत गेली नाही, अशी भूमिका एका बड्या नेत्याकडून व्यक्त करण्यात आली.
हेही वाचा – सात लाख शेतकरी कर्जमाफीपासून वंचित
मतदारसंघांच्या आढाव्यासाठी समिती
आगामी महापालिका निवडणुकांच्या पार्श्वभूमीवर पार पडलेल्या बैठकीत मतदारसंघांचा आढावा घेण्यासाठी मनसेच्या नेत्यांची एक समिती तयार केली जाईल. ही समिती त्या-त्या प्रभागातील उमेदवारांचा आढावा घेईल. त्याचप्रमाणे युतीबाबतच्या निर्णयाच्या वेळी या समितीचे म्हणणे विचारात घेतले जाईल, अशी माहिती पुढे आली आहे.
