न्यायमूर्ती आलोक आराधे यांचा मुख्य न्यायमूर्ती म्हणून उद्या शपथविधी

सर्वोच्च न्यायालयाच्या न्यायवृंदाने ७ जानेवारी रोजी तेलंगणाच्या मुख्य न्यायमूर्तीपदी कार्यरत असलेल्या आराधे यांची मुंबई उच्च न्यायालयाच्या मुख्य न्यायमूर्तीपदी नियुक्तीची शिफारस करण्यात आली होती. त्यानंतर, त्याबाबतचा प्रस्ताव केंद्र सरकारने राष्ट्रपतींकडे पाठवला होता. त्याला राष्ट्रपतींनी गेल्या आठवड्यात मंजुरी दिली.

हेही वाचा >>>मुंबई : महापालिकेचे ५८६ कर्मचारी निवडणूक कामातच, ४६ जणांचे वेतन रोखले

न्यायमूर्ती आराधे हे मूळचे मध्यप्रदेश येथील आहेत. त्यांची २००९ मध्ये मध्य प्रदेश उच्च न्यायालयात अतिरिक्त न्यायमूर्ती म्हणून नियुक्ती झाल्यानंतर २०११ मध्ये ते कायमस्वरूपी न्यायमूर्ती झाले. त्यानंतर, २०१६ मध्ये न्यायमूर्ती आराधे यांची जम्मू आणि काश्मीर उच्च न्यायालयात बदली झाली आणि २०१८ मध्ये त्यांनी तिथे तीन महिने प्रभारी मुख्य न्यायमूर्ती म्हणून काम पाहिले. पुढे, १७ नोव्हेंबर २०१८ रोजी कर्नाटक उच्च न्यायालयाचे न्यायमूर्ती म्हणून न्यायमूर्ती आराधे यांनी शपथ घेतली आणि तेथेही २०२२ मध्ये त्यांनी काही महिने प्रभारी मुख्य न्यायमूर्ती म्हणून काम पाहिले. जुलै २०२३ मध्ये न्यायमूर्ती आराधे .यांची तेलंगणा उच्च न्यायालयाचे मुख्य न्यायमूर्ती म्हणून नियुक्ती करण्यात आली होती.

दरम्यान, मुंबई उच्च न्यायालयाचे मुख्य न्यायमूर्ती देवेंद्र कुमार उपाध्याय यांची दिल्ली उच्च न्यायालयाचे मुख्य न्यायमूर्ती म्हणून बदली करण्यात आली. मूळचे अलाहाबाद येथील असलेले न्यायमूर्ती उपाध्याय यांनी ऑगस्ट २०२३ मध्ये मुंबई उच्च न्यायालयाचे न्यायमूर्ती म्हणून पदभार स्वीकारला होता. तसेच, सव्वावर्षांहून अधिकच्या मुख्य न्यायमूर्तीबदाच्या कार्यकाळात त्यांनी अनेक महत्वाच्या प्रकरणांवर निकाल दिला. मराठा आरक्षणाशी संबंधित सुनावणीही त्यांच्या अध्यक्षतेखालील खंडपीठासमोर सुरू होती.