पोलीस ठाण्यात जबाब नोंदवल्यावर किरीट सोमय्यांचा इशारा; म्हणाले, “उद्या पत्रकार परिषद घेऊन…”

यावेळी बोलताना ते म्हणाले की, “पोलिसांनी एफआयआरची प्रत मला देणं ही हास्यास्पद बाब आहे. छगन भुजबळांची १०० कोटींची बेनामी संपत्ती पाहण्यासाठी मी गेलो होतो, हा गुन्हा आहे. त्यांच्या बेनामी संपत्तीचा घोटाळा मी उघड केला होता. त्यानंतर भुजबळ २ वर्ष तुरुंगात गेले. ती प्रॉपर्टी मी मीडियाला सोबत घेऊन बघायला गेलो, ते त्यांना दिसलं, त्यामुळे भुजबळांच्या दबावामुळे माझ्यावर गुन्हा दाखल करण्यात आला आहे,” असा आरोप सोमय्यांनी केला.

मुंबई पोलिसांनी समन्स पाठवल्याने किरीट सोमय्यांचा संताप; म्हणाले “ठाकरे सरकारच्या घोटाळेबाजांनी…”

किरीट सोमय्यांचा मुलगा नील सोमय्याला तुरुंगात टाकू, असं उद्धव ठाकरे म्हणाले होते. आज त्यांनी एफआयआरची प्रत दिली आहे, पुढच्या काही दिवसांत कायदेशीर सल्ला घेऊन निर्णय घेईल असं ते म्हणाले. तसेच घोटाळा करणारे संजय राऊत आणि त्यांचा पार्टनर सुजीत पाटकरविरोधात गुन्हा दाखल होत नाही, परंतु मी १०० कोटींची बेनामी संपत्ती मीडियाला दाखवली म्हणून माझ्यावर गुन्हा दाखल होतोय, असं सोमय्यांनी सुनावलं.

“गेल्या १० दिवसांपासून शिवसेना माझ्यावर आरोप करत नौटंकी करत आहे. पण कोणत्याच गुन्ह्याबद्दल ते एक कागद पुरावा म्हणून देऊ शकलेले नाही आणि रोज रंगीत तालिम सुरू आहे, अशी टीका त्यांनी शिवसेना नेत्यांवर केली. मुख्यमंत्री घराबाहेर पडत नाही आणि अजित पवार मुख्यमंत्र्यांसारखे वावरतात, मग ते लाइफलाईनवर गुन्हा दाखल का करत नाहीत, असा सवाल सोमय्यांनी उपस्थित केला. उद्धव ठाकरे आणि अजित पवार राज्याला लुटत असताना मी शांत बसणार नाही. शिवीगाळ सोडा, उद्धव ठाकरेंनी हजार वेळा जरी तुरुंगात टाकलं तरी मी घोटाळामुक्त महाराष्ट्र करून दाखवणार,” असं किरीट सोमय्या म्हणाले. मी पैसे लाटल्याचा आणि कोट्यवधी रुपयांचा घोटाळा केल्याचा आरोप शिवसेनेने केला आहे, त्यासंदर्भात मी उद्या पत्रकार परिषद घेऊन उत्तर देणार असल्याचं किरीट सोमय्यांनी सांगितलं.