मुंबई : गेटवे ऑफ इंडिया येथील प्रवासी जलवाहतुकीचा ताण कमी करण्यासाठी रेडिओ ब्लब, अपोलो बंदर येथे नवीन प्रवासी धक्क्याचे (जेट्टी) काम सुरु करण्यात आले आहे. मात्र, त्याला कुलाबावासियांनी विरोध केला आहे. गेट वे ऑफ इंडिया येथून जलप्रवास करणाऱ्या प्रवाशांची संख्या दिवसेंदिवस वाढत असून भविष्यात या प्रवासी संख्येंत आणखी वाढ होण्याचा अंदाज महाराष्ट्र सागरी मंडळाने वर्तविला होता. ही बाब लक्षात घेत सागरी मंडळाने गेट वे ऑफ इंडिया येथील प्रवाशांचा ताण कमी करण्यासाठी अपोलो बंदर परिसरातील रेडिओ क्लबजवळ एक मोठा धक्का बांधण्याचा निर्णय २०२२ मध्ये घेतला होता. तो बांधण्याचा प्रस्ताव केंद्र सरकारने मंजूर केला. त्यानुसार तेथे एकाचवेळी १० ठिकाणी २० बोटी उभ्या करण्याची सुविधा उपलब्ध करुन देण्यात येणार आहे. काही दिवसांपूर्वी या प्रकल्पाचे भूमिपूजनही करण्यात आले आहे.

दरम्यान, कुलाबावासियांनी मात्र या प्रकल्पाला विरोध केला आहे. स्थानिक समस्यांचा विचार न करता या धक्क्याचे नियोजन केले जात असल्याचा आरोप रहिवाशांनी केला आहे. ताजमहल पॅलेससमोरील रस्त्यावर नेहमीच पर्यटकांची वर्दळ असते. त्यामुळे तेथील रहिवाशांना वाहतूककोंडीचा सामना करावा लागत आहे. त्यातच आता या नवीन धक्क्यामुळे भविष्यात तेथील वाहतूककोंडीची समस्या जटील होऊ शकते, असे रहिवासी रॉकी लोबो यांनी सांगितले. सुट्टीच्या दिवशी हा परिसर नेहमी गजबजलेला असतो तर, इतर दिवशीही येथे वाहनांची वर्दळ मोठ्या प्रमाणात असते. या प्रकल्पाला आमचा विरोध नाही. मात्र, त्यासाठी निवडण्यात आलेल्या जागेला आमचा विरोध आहे. गेट वे ऑफ इंडियाच्या एेवजी हा प्रकल्प प्रिन्सेस डॉक येथे स्थलांतरीत करण्यात यावा अशी मागणी आता जोर धरु लागली आहे.

काम बंद करण्याची मागणी

शुक्रवारी या धक्क्याच्या कामाला सुरुवात करण्यात आली आहे. त्यावेळी परिसरातील रहिवासी गेटवे ऑफ इंडिया येथे एकत्र येऊन त्यांनी कामाला विरोध करत काम बंद करण्याची मागणी केली होती. यावेळी पोलिसांनी हस्तक्षेप करुन आंदोलन थांबिवले.

विधानसभा अध्यक्ष राहुल नार्वेकर यांच्याशी चर्चा

याप्रकरणी विधानसभेतही हा मुद्दा विधानसभा अध्यक्ष राहुल नार्वेकर यांनी मांडला होता. याप्रकरणी योग्य तो निर्णय घेतला जाईल असे आश्वासन नार्वेकर यांनी रहिवाशांना दिले आहे. याबाबत पुढील बैठक लवकरच घेण्यात येणार आहे.

याआधी सहा ठिकाणी बोटी उभ्य़ा करण्याची सुविधा

या धक्क्यावर एकाच वेळी सहा ठिकाणी बोटी उभ्या करण्याची व्यवस्था करण्यात येणार होती. त्यासाठी फेब्रुवारी २०२२ मध्ये निविदा मागवि्ण्यात आल्या. त्यानंतर मात्र या धक्क्यावर सहाएेवजी १० ठिकाणी २० बोटी उभ्या करम्याची सुविधा उपलब्ध करून देण्याचा निर्णय घेण्यात आला. त्यादृष्टीने धक्क्य़ावर बांधकाम करण्याचा निर्णय घेण्यात आला.

नव्या जेट्टीचे वैशिष्ट्ये

एका वेळी २० बोटी उभ्या राहणार

प्रवासी निवारा, वाहनतळ आदी सुविधांचाही समावेश

काम सुरु झाल्यापासून दोन वर्षांत काम पूर्ण करण्याचे नियोजन