विरार स्टेशनवर उभ्या असलेल्या एका गरोदर महिलेने बाळाला जन्म दिला. ही महिला पालघरच्या सफाळे भागातली आहे. ट्रेन प्लॅटफॉर्मवर असतानाच या महिलेला मुलगी झाली. बाळ आणि महिलेची प्रकृती चांगली आहे अशीही माहिती कळते आहे.
आज सकाळी साडेअकराच्या सुमारास विरार रेल्वे स्थानकातल्या प्लॅटफॉर्म क्रमांक तीनवर ही घटना घडली. सोनी अजय पटेल या डहाणू लोकलच्या अपंगांच्या डब्यात बसल्या होत्या. विरार स्टेशनवर जेव्हा ट्रेन आली तेव्हाच त्यांना प्रसुतीवेदना सुरू झाल्या. रेल्वे स्थानकावरच्या आरपीएफ, जीआरपी यांना ही माहिती कळताच त्यांनी महिला पोलीस, सफाई कामगार महिला यांना तातडीने बोलावलं. त्यानंतर लोकलच्या डब्यातच सोनी पटेल यांची प्रसुती झाली. त्यांनी एका मुलीला जन्म दिला. यानंतर सोनी पटेल यांना विरार ग्रामीण रूग्णालयात दाखल करण्यात आलं. या दोघींची प्रकृती आता चांगली आहे असेही समजते आहे. एका मराठी वृत्तवाहिनीने हे वृत्त दिले आहे.
